ہندوستان بنا فری اسٹائل ٹیم چیمپئن

نئی دہلی، 27 مئی (یو این آئی) ویتنام کے دا نانگ میں منعقدہ انڈر 23 ایشیائی کشتی چیمپیئن شپ میں ہندوستان کی مردوں کی فری اسٹائل ٹیم بلا موازنہ چیمپیئن بن کر ابھری ہے۔ ٹیم نے شاندار کارکردگی کا مظاہرہ کرتے ہوئے پہلی پوزیشن حاصل کی اور چیمپیئن شپ ٹرافی اپنے نام کر لی۔ فری اسٹائل رینکنگ میں ہندوستان کا دبدبہ رہا اور اس نے کشتی کی دنیا کے دو بڑے ممالک – کرغیزستان اور قازقستان کو پیچھے چھوڑتے ہوئے ٹاپ پوزیشن حاصل کی۔ کرغیزستان دوسرے اور قازقستان تیسرے نمبر پر رہا۔فری اسٹائل میں ملنے والی اس تاریخی جیت کے ساتھ ہی پورے ہندوستانی دستے کی شاندار براعظمی مہم کا بھی اختتام ہو گیا۔ اس مہم کے دوران ہندوستان نے فری اسٹائل، خواتین کی کشتی اور گریکو رومن زمروں (کیٹیگریز) میں مجموعی طور پر 27 تمغے (میڈلز) حاصل کیے، جن میں 11 سونے (گولڈ)، 7 چاندی (سلور) اور 9 کانسی (برونز) کے تمغے شامل ہیں۔چیمپیئن شپ جیتنے والی فری اسٹائل ٹیم نے اپنی مہم کا اختتام 9 تمغوں کے ساتھ کیا، جن میں 4 گولڈ، 3 سلور اور 2 برونز میڈلز شامل ہیں۔ اکشے ٹی دھیرے (57 کلوگرام) اور وکی (97 کلوگرام) نے شاندار کارکردگی کا مظاہرہ کرتے ہوئے سونے کے تمغے جیت کر مہم کا آغاز کیا۔ اس تسلسل کو کمار موہت (65 کلوگرام) اور چندر موہن (79 کلوگرام) نے آگے بڑھایا، جنہوں نے گولڈ میڈل جیت کر پوڈیم پر پہلی پوزیشن حاصل کی۔ دیپک راٹھی (61 کلوگرام)، پنیت کمار (92 کلوگرام) اور لکی (125 کلوگرام) نے سخت مقابلے میں چاندی کے تمغے جیت کر اس تاریخی ٹیم ٹائٹل میں اپنا تعاون پیش کیا۔ وہیں، دیپک بیروال (74 کلوگرام) اور مور سچن (82 کلوگرام) نے کانسی کے تمغے جیت کر فری اسٹائل کے تمغوں کی تعداد کو مکمل کیا۔ہندوستانی کشتی فیڈریشن کے صدر سنجے سنگھ نے کہا، “انڈر 23 ایشیائی چیمپیئن شپ ٹرافی جیتنا ہندوستانی کشتی کے لیے ایک بہت بڑی کامیابی ہے اور پورے ملک کیلئے انتہائی فخر کا لمحہ ہے۔ ہمارے فری اسٹائل پہلوانوں نے بے مثال عزم اور تکنیکی مہارت کا مظاہرہ کرتے ہوئے کرغیزستان اور قازقستان جیسے کشتی کے سرفہرست ممالک کو پیچھے چھوڑ دیا۔” انہوں نے مزید کہا، “تینوں اسٹائلز میں ہمارے کھلاڑیوں نے یہ ثابت کر دیا ہے کہ ہندوستانی کشتی کا مستقبل انتہائی روشن ہے۔
اس تاریخی جیت کو ممکن بنانے کے لیے میں اپنے تمام تمغہ جیتنے والوں، کوچز اور سپورٹ اسٹاف کو دلی مبارکباد پیش کرتا ہوں۔”
پورے ٹورنامنٹ کے دوران ہندوستان کی خاتون پہلوانوں کی کارکردگی بھی اتنی ہی متاثر کن رہی۔ انہوں نے غیر معمولی کارکردگی کا مظاہرہ کرتے ہوئے کل 10 تمغے اپنے نام کیے۔ خواتین کی ٹیم نے شاندار کھیل پیش کرتے ہوئے چھ گولڈ میڈل جیتے۔ مسکان (53)، تپسیا (57)، بھاگیہ شری (62)، پلکت (67)، مانسی (68) اور کاجل (76) نے اپنے اپنے ٹائٹل مقابلوں میں بہترین تکنیکی صلاحیتوں کا مظاہرہ کیا۔ نیہا (59) اور سویٹی (50) نے بہادری سے لڑتے ہوئے سلور میڈل حاصل کیے، جبکہ امریتا (72) اور اہلیا (55) نے برونز میڈل جیت کر پوڈیم پر اپنی جگہ بنائی۔
گریکو رومن کیٹیگری میں، ہندوستانی پہلوانوں نے ٹورنامنٹ کے آغاز میں ہی آٹھ میڈل جیت کر ایک مضبوط بنیاد رکھی تھی۔ سمیت نے 63 کلوگرام زمرے میں شاندار گولڈ میڈل جیت کر ٹیم کی قیادت کی، جبکہ سورج (60) اور ساگر سنگھ (67) نے سلور میڈل جیت کر ان کا ساتھ دیا۔ نیرج پٹیل (55)، سچن (77)، روہت بورا (87)، روہت (97) اور ہردیپ (130) نے بھی اپنی محنت سے برونز میڈل جیت کر اس شاندار کامیابی میں اپنا تعاون دیا۔
انڈر 23 مقابلے کے انتہائی کامیاب اختتام کے بعد، اب سبھی کی نظریں سب جونیئر ٹیم پر ہوں گی۔ انڈر 17 ایشین ریسلنگ چیمپیئن شپ کل سے اسی مقام یعنی دا نانگ میں شروع ہونے والی ہے، جس کے ابتدائی مقابلے صبح 10 بجے سے شروع ہوں گے۔