سنجو سیمسن اور جسپریت بمراہ دوڑ میں شامل
دبئی، 6 اپریل (یواین آئی ) انٹرنیشنل کرکٹ کونسل (آئی سی سی) نے مارچ 2026 کے لیے ‘پلیر آف دی منتھ‘ ایوارڈ کی نامزدگیوں کا اعلان کر دیا ہے۔ مردوں کے زمرے میں ہندوستانی اسٹار بلے باز سنجو سیمسن، تیز گیند باز جسپریت بمراہ اور جنوبی افریقہ کے ابھرتے ہوئے بلے باز کونر ایسٹرہوئزن کو شارٹ لسٹ کیا گیا ہے۔مارچ کا مہینہ ہندوستانی کھلاڑیوں کے لیے انتہائی یادگار رہا، جس کا عکس ان نامزدگیوں میں بھی نظر آتا ہے۔ آئی سی سی مینز ٹی 20 ورلڈ کپ کے اختتامی مراحل میں سیمسن کی شاندار فارم نے انہیں نہ صرف ‘پلیر آف دی ٹورنامنٹ‘ کا اعزاز دلایا بلکہ اس ماہ کی نامزدگیوں میں بھی سرفہرست رکھا۔ ورلڈ کپ فائنل کے ‘پلیر آف دی میچ‘ رہنے والے بمراہ اپنی مہلک گیند بازی کی بدولت اس ایوارڈ کے مضبوط دعویدار بن کر ابھرے ہیں۔جنوبی افریقہ کے کونر ایسٹرہوئزن نے نیوزی لینڈ کے خلاف اپنی پہلی ٹی 20 سیریز میں تاریخی کارکردگی دکھائی۔ وہ پانچ میچوں کے بعد اپنے ملک کے کسی بھی کھلاڑی کے مقابلے میں بہترین اعداد و شمار درج کرنے والے کھلاڑی بن گئے ہیں۔
