’میری انگلی پکڑ کر سیاست میں آنے والے مجھ کو ہی بھٹکتی آتما کہہ رہے‘، پی ایم مودی پر شرد پوار کا جوابی حملہ
![](https://jadeedbharat.com/wp-content/uploads/2024/04/sharad_pawar02-hZVwO5-750x450.jpeg)
این سی پی سربراہ شرد پوار نے پی ایم مودی کے ذریعہ اپنے اوپر کیے گئے حملے کو آج تنقید کا نشانہ بنایا۔ انھوں نے پی ایم مودی کو سخت جواب دیتے ہوئے کہا کہ ’’وہ میری انگلی پکڑ کر سیاست میں آئے اور اب مجھے ہی بھٹکتی آتما کہہ رہے ہیں۔ ہاں میں کسانوں کا درد بانٹنے کے لیے بھٹکتا ہوں، میں مہنگائی سے نبرد آزما عام آدمی کی پریشانیوں کو بانٹنے کے لیے بھٹکتا ہوں۔‘‘
واضح رہے کہ ایک دن قبل پونے میں ایک ریلی سے خطاب کرتے ہوئے مودی نے پوار کا نام لیے بغیر بھٹکتی آتما کہا تھا۔ اس تعلق سے مہاوکاس اگھاڑی میں شامل شیوسینا (یو بی ٹی) لیڈر سنجے راؤت اور ادتیہ ٹھاکرے نے بھی پی ایم مودی کو تنقید کا نشانہ بنایا ہے۔ سنجے راؤت نے کہا کہ پی ایم مودی کی آتما دہلی سے مہاراشٹر آتی ہے۔ وہ بھٹکتی ہے۔ ان کی آتما اس لیے بھٹک رہی ہے کیونکہ 4 جون کے بعد بی جے پی کے لیے مہاراشٹر شمشان گھاٹ بن جائے گا۔ دوسری طرف آدتیہ ٹھاکرے نے کہا کہ پی ایم کا پوار کو بھٹکتی آتما کہنا قطعاً درست نہیں ہے۔ یہ ہماری ثقافت اور روایت کے خلاف ہے۔ اگر انہیں اپنے کام پر اتنا ہی اعتماد ہے تو انہیں اپنے کام پر ہی بات کرنی چاہیے۔
شرد پوار پر پی ایم مودی کے مذکورہ بالا متنازعہ بیان پر مہاراشٹر کے نائب وزیر اعلیٰ اجیت پوار سے بھی سوال کیا گیا۔ ایک پروگرام کے دوران صحافیوں نے جب ان سے اس بابت دریافت کیا تو انہوں نے کہا کہ جب پی ایم مودی کا اگلا جلسہ ہوگا تو میں بھی اس میں موجود رہوں گا۔ اس وقت میں ان سے پوچھوں گا کہ انہوں نے بھٹکتی آتما کس کو کہا اور اس کا کیا مقصد تھا۔ جب وہ مجھے بتائیں گے تو میں آپ سب کو اس بارے میں بتاؤں گا۔
![Follow us on Google News](https://jadeedbharat.com/wp-content/uploads/2024/01/GoogleNews.png)