اس بل سے کسانوں اور غریبوں کو فائدہ ہوگا؛دیہی ترقی کے وزیر شیوراج سنگھ چوہان کا دعویٰ
نئی دہلی، 18 دسمبر (یواین آئی) لوک سبھا نے جمعرات کو ڈیویلپڈ انڈیا ایمپلائمنٹ اینڈ لائیولی ہو ڈ گارنٹی مشن (دیہی) وی بی-جی-رام جی بل 2025 کو اپوزیشن کے زبردست ہنگامے اور مخالفت کے درمیان منظور کرلیا گیا۔مرکزی دیہی ترقی کے وزیر شیوراج سنگھ چوہان نے منریگا ایکٹ کی جگہ لینے والے وی بی-جی رام جی بل پر بدھ کی آدھی رات تک جاری بحث کا جواب دیتے ہوئے کہا کہ اس بل کا مقصد خواتین، نوجوانوں اور غریبوں کی زندگیوں کو بدل کر باپو کے نظریات کو زندہ رکھنا ہے۔ یہ غریبوں کی زندگیوں کو بدل دے گا اور مثالی گاؤں قائم کرے گا جہاں لوگوں کو ہر قسم کی سہولیات میسر ہوں گی۔انہوں نے کہاکہ “ہم کسی کے ساتھ امتیازی سلوک نہیں کرتے۔ باپو ہماری تحریک اور تعظیم ہیں۔ پورا ملک ہمارے لیے ایک ہے۔ ہمارے خیالات تنگ اور محدود نہیں ہیں۔ کانگریس پارٹی نے منریگا کو مکمل طور پر بدعنوانی کے حوالے کر دیا تھا۔” انہوں نے کہاکہ ’’کانگریس حکومت کا جواب نہیں سننا چاہتی‘‘۔ انہوں نے کہا کہ منریگا فنڈز کا درحقیقت غلط استعمال ہوا ہے۔ دوسری طرف ہماری حکومت نے انہیں ترقیاتی منصوبوں پر خرچ کیا ہے۔ انہوں نے کہا کہ اس بل سے کسانوں اور غریبوں کو فائدہ ہوگا۔انہوں نے کہا کہ مہاتما گاندھی کے نام کو ذہن میں رکھ کر نریگا کا آغاز نہیں کیا گیا تھا۔ انہوں نے 2009 کے انتخابات سے قبل ووٹ بینک کے جذبات کو فروغ دینے کے لیے اس اسکیم میں ان کا نام شامل کیا۔ انہوں نے کہا کہ یونائیٹڈ پروگریسو الائنس (یو پی اے) نے اپنے دور حکومت میں اس اسکیم پر صرف 2.13 لاکھ کروڑ روپے خرچ کیے، جب کہ مودی حکومت نے 2014 سے اب تک اس پر 8.53 لاکھ کروڑ روپے خرچ کیے ہیں۔ انہوں نے کہا کہ اس اسکیم میں پہلے بھی بدعنوانی تھی، لیکن مودی حکومت نے اسے بدعنوانی سے پاک کر دیا ہے۔دیہی ترقی کے وزیر نے کانگریس جنرل سکریٹری پرینکا گاندھی واڈرا کے ان الزامات کو مسترد کردیا کہ وزیر اعظم نریندر مودی کی حکومت اسکیموں کے نام اپنی مرضی سے تبدیل کرتی ہے۔ اس الزام کا جواب دیتے ہوئے انہوں نے نہرو-گاندھی خاندان کے افراد کے نام پر کئی فلاحی پروگراموں کی فہرست دی اور دلیل دی کہ کانگریس کی سیاسی فائدے کے لیے نام شامل کرنے کی ایک طویل تاریخ ہے۔انہوں نے کانگریس پارٹی پر مہاتما گاندھی کے نظریات کو دھوکہ دینے کا بھی الزام لگایا، کہا کہ پارٹی نے ہندوستان کی تقسیم کو قبول کیا اور آزادی کے بعد کانگریس پارٹی کو تحلیل کرنے کے گاندھی کے مطالبے کو نظر انداز کیا۔ کانگریس نے خود گاندھیائی اصولوں کو تباہ کر دیا تھا۔انہوں نے کہا کہ اس بل کے نام میں ہی اس اسکیم کا مقصد لکھا ہوا ہے۔ یہ اسکیم روزگار کی ضمانت دیتی ہے اور ذریعہ معاش کو فروغ دیتی ہے۔ یہ ایک خوشحال اور شاندار ہندوستان کی تعمیر کر رہا ہے۔ ترقی یافتہ ہندوستان کے لیے ترقی یافتہ گاؤں بنائے جا رہے ہیں۔ انہوں نے کہا کہ ریاستوں کے درمیان رقوم کی غیر مساوی تقسیم کو درست کرنے کے لیے منریگا کی جگہ نیا بل پیش کیا گیا ہے۔ منریگا کو بدعنوانی کے لیے چھوڑ دیا گیا تھا اور اسے درست کرنا ضروری تھا۔ منریگا کے صحیح استعمال اور فنڈز کے صحیح استعمال کو یقینی بنانے کے لیے ان کوتاہیوں پر غور کیا گیا۔ وسیع بحث کے بعد منریگا میں ترامیم پیش کی گئیں۔مرکزی وزیر کے جواب کے دوران اپوزیشن ایوان کے وسط میں بل کے خلاف نعرے بازی کرتی رہی۔ ہنگامہ کے درمیان شیوراج سنگھ چوہان نے اپنا جواب دیا۔ اس دوران کچھ ارکان نے کاغذات پھاڑ کر پوڈیم کے قریب پھینکے۔
لوک سبھا اسپیکر اوم برلا نے ریمارکس دیے، “ملک کے لوگوں نے آپ کو یہاں کاغذات پھینکنے کے لیے نہیں بھیجا ہے۔ یہ بھی پارلیمانی روایات کے مطابق نہیں ہے۔” اسپیکر کی درخواست کے باوجود ہنگامہ آرائی جاری رہی جس کے باعث ایوان کی کارروائی دن بھر کے لیے ملتوی کردی گئی۔
