الیکشن کمیشن نے پانچ ریاستوں کے اسمبلی انتخابات اور ضمنی انتخابات کے لیے 1,111 مرکزی مبصرین تعینات کیئے

نئی دہلی، 17 مارچ (یو این آئی) الیکشن کمیشن آف انڈیا نے آسام، کیرالہ، تمل ناڈو، مغربی بنگال اور پڈوچیری میں قانون ساز اسمبلی کے انتخابات اور چھ ریاستوں میں ہونے والے ضمنی انتخابات کے لیے 1,111 مرکزی مبصرین تعینات کیے ہیں، تاکہ آزادانہ اور منصفانہ پولنگ کو یقینی بنایا جا سکے۔منگل کو جاری کردہ ایک سرکاری پریس نوٹ کے مطابق، یہ مبصرین، جن میں جنرل، پولیس اور اخراجات سے متعلق افسران شامل ہیں، انتخابی عمل کے دوران کمیشن کے “آنکھ اور کان” کے طور پر کام کریں گے۔ یہ تعیناتی تشدد اورکسی لالچ سے پاک ماحول میں انتخابات کرانے پر کمیشن کے زور کے عین مطابق ہے۔ چیف الیکشن کمشنر گیانیش کمار نے اس سے قبل انتخابی شیڈول کے اعلان کے وقت اس مقصد پر روشنی ڈالی تھی۔ انہوں نے زمینی سطح پر سخت نگرانی کی اہمیت پر زور دیتے ہوئے کہا تھا کہ “انتخابات اس طریقے سے منعقد کیے جانے چاہئیں کہ ہر ووٹر بغیر کسی خوف یا طرفداری کے اپنا ووٹ ڈال سکے۔”کمیشن کی جانب سے شیئر کیے گئے اعداد و شمار بتاتے ہیں کہ کل 832 اسمبلی حلقوں اور ضمنی انتخابی نشستوں پر 557 جنرل مبصرین، 188 پولیس مبصرین اور 366 اخراجات کے مبصرین تعینات کیے گئے ہیں۔ انتخابی ریاستوں میں، مغربی بنگال میں جنرل مبصرین کی تعداد سب سے زیادہ 294 ہے، اس کے بعد تمل ناڈو میں 136، جبکہ آسام اور کیرالہ میں 51، 51 مبصرین مقرر کیے گئے ہیں۔ پڈوچیری کے لیے 17 جنرل مبصرین مختص کیے گئے ہیں۔ کمیشن نے تمام مبصرین کو ہدایت دی ہے کہ وہ 18 مارچ تک اپنے متعلقہ حلقوں میں پہنچ جائیں۔ وہاں پہنچنے کے بعد، وہ اپنی رابطہ کی تفصیلات عام کریں گے اور ہر روز ایک مقررہ وقت امیدواروں، سیاسی جماعتوں، ان کے نمائندوں اور عوام سے ملنے کے لیے وقف کریں گے تاکہ انتخاب سے متعلق شکایات کا ازالہ کیا جا سکے۔مرکزی مبصرین کا تقرر دستور ہند کے آرٹیکل 324 اور عوامی نمائندگی ایکٹ )، 1951 کے سیکشن 20B کے تحت کیا جاتا ہے۔ یہ حکام پولنگ کے عمل کی نگرانی کرنے اور فیلڈ لیول پر انتخابی رہنما خطوط کی پابندی کو یقینی بنانے میں اہم کردار ادا کرتے ہیں۔ بڑے پیمانے پر یہ تعیناتی کثیر مرحلہ وار انتخابات کے دوران کمیشن کی جانب سے سخت نگرانی کی عکاسی کرتی ہے، خاص طور پر ان ریاستوں میں جہاں سخت سیاسی مقابلہ پایا جاتا ہے۔ حکام کا کہنا ہے کہ مبصرین کی موجودگی سے شفافیت کو تقویت ملے گی، بدعنوانیوں پر قابو پایا جا سکے گا اور تمام انتخابی علاقوں میں انتخابی عمل کے ہموار انتظام کو یقینی بنایا جائے گا۔