سپریم کورٹ نے کیرالہ حکومت کی اپیل خارج کر دی؛ پنشنرز کے ساتھ امتیاز کو ’من مانی‘ قرار دیا
نئی دہلی، 11 اپریل: سپریم کورٹ نے جمعہ کو ایک اہم فیصلہ سناتے ہوئے کہا ہے کہ حکومت مہنگائی الاؤنس میں اضافہ کرتے وقت حاضر سروس ملازمین اور پنشنرز کے درمیان کسی قسم کا امتیاز نہیں کر سکتی۔ جسٹس منوج مشرا اور جسٹس پرسنا بی ورلے کی بنچ نے ریٹائرڈ ملازمین کے برابری کے حق کو برقرار رکھا۔ عدالت نے ریمارکس دیے کہ چونکہ مہنگائی کا دباؤ ہر فرد پر یکساں ہوتا ہے، اس لیے مہنگائی الاؤنس (DA) اور مہنگائی ریلیف (DR) کی شرح میں تفریق کی کوئی منطقی یا قانونی بنیاد موجود نہیں ہے۔ عدالت نے اپنے فیصلے میں کہا کہ اگرچہ مالی رکاوٹیں بعض مراعات کی ادائیگی میں تاخیر کا سبب ہو سکتی ہیں، لیکن ایک بار الاؤنس دینے کا فیصلہ ہونے کے بعد پنشنرز کے مقابلے میں حاضر سروس ملازمین کے لیے زیادہ شرح طے کرنا سراسر’ من مانی‘ ہے۔ بنچ کے مطابق یہ عمل آئین کے آرٹیکل 14 (حقِ مساوات) کی کھلی خلاف ورزی ہے۔ عدالت نے ریاست کیرالہ اور کے ایس آر ٹی سی کی اپیلیں خارج کرتے ہوئے واضح کیا کہ مساوات اور من مانی ایک دوسرے کے ضد ہیں، اور حکومت کو دونوں طبقات کو درپیش مشکلات کو یکساں نظر سے دیکھنا چاہیے۔ سپریم کورٹ نے مزید مشاہدہ کیا کہ مہنگائی الاؤنس کا بنیادی مقصد ہی بڑھتی ہوئی قیمتوں کے اثرات کو کم کرنا ہے، جو ملازم اور پنشنر دونوں کو برابر متاثر کرتی ہیں۔ عدالت نے حکومت کی جانب سے ڈی اے میں 14 فیصد اور ڈی آر میں صرف 11 فیصد اضافے کو غیر منصفانہ قرار دیتے ہوئے اسے مسترد کر دیا۔ یہ فیصلہ مستقبل میں ریٹائرڈ ملازمین کے مالی حقوق کے تحفظ اور سرکاری مراعات میں مساوی سلوک کو یقینی بنانے کے حوالے سے انتہائی اہمیت کا حامل قرار دیا جا رہا ہے۔ بنچ نے مشاہدہ کیا کہ جب یہ فوائد ایک مشترکہ مقصد یعنی مہنگائی سے نمٹنے کے لیے دیے جاتے ہیں، تو یہ دیکھتے ہوئے کہ مہنگائی کا دباؤ سب پر یکساں ہے، ڈی اے اور ڈی آر کی شرح میں تفریق کی کوئی منطقی بنیاد موجود نہیں ہے۔ سپریم کورٹ کا یہ فیصلہ ریٹائرڈ ملازمین کے مالی حقوق کے تحفظ اور سرکاری مراعات میں مساوی سلوک کو یقینی بنانے کے حوالے سے ایک بڑی مثال مانا جا رہا ہے۔
