اپوزیشن لیڈر کی حیثیت سے ایک سال میں عوامی مسائل کو شدت کے ساتھ اٹھایا ہے: راہل

نئی دہلی، 2 جولائی (یواین آئی) :کانگریس لیڈر راہل گاندھی نے لوک سبھا میں اپوزیشن لیڈر کے طور پر اپنے ایک سالہ دور کو یادگار قرار دیتے ہوئے کہا ہے کہ اس دوران انہوں نے پارلیمنٹ میں عوام کے مسائل کو شدت کے ساتھ اٹھایا اور لوگوں کو بے خوف ہو کر اپنے حقوق کے بارے میں بات کرنے کی ترغیب دی، ساتھ ہی آئین کے تحفظ کے لیے اپنی جنگ مضبوطی سے لڑی۔بدھ کو سوشل میڈیا پر ایک پوسٹ میں، مسٹر گاندھی نے کہا، "لوک سبھا میں قائد حزب اختلاف کے طور پر ایک سال مکمل کرنے پر، میں آپ کے ساتھ پورے سال کی یادیں، تجربات اور آئین کے تحفظ کے لیے اپنی لڑائی شیئر کر رہا ہوں۔ میں اپنی پارلیمانی تقریروں، ہندوستانی معیشت کے لیے اپنے وژن اور 2024 لوک سبھا انتخابات میں انڈیا الائنس کی جیت کے پیچھے کے عوامل، منی پور کے لوگوں سے لے کر کسانوں تک، آنگن واڑی کارکنوں سے لے کر دلت نوجوانوں تک - ملک بھر کے لوگوں کے ساتھ اپنی ملاقاتوں کی تفصیل شیئر کررہاہوں۔ محبت اور سچائی کے راستے پر آپ کے ساتھ ہوں۔قائد حزب اختلاف کی حیثیت سے اپنے سال بھر کے پروگراموں کی تفصیل بتاتے ہوئے انہوں نے کہا کہ اس عرصے میں انہوں نے 115 سے زائد عوامی رابطہ کیا، پارلیمنٹ میں 16 تقاریر کیں اور 35 سے زائد سرکاری پروگراموں میں شرکت کی۔ وہ 60 سے زائد عوامی جلسوں اور 16 پریس کانفرنسوں سے خطاب کر چکے ہیں۔ انہوں نے پارلیمنٹ سے لے کر سڑکوں تک عوام کی آواز اٹھائی ہے اور خاص طور پر ملک کی 90 فیصد آبادی کو متاثر کرنے والے مسائل کو اٹھایا ہے۔کانگریس پارٹی نے ایک نیوز لیٹر کے ذریعہ مسٹر گاندھی کے ذریعہ کئے گئے کاموں کو پریس کے ساتھ شیئر کیا اور کہا کہ اس مدت کے دوران انہوں نے ملک کی معیشت اور شراکت کے لئے ایک نیا وژن پیش کیا ہے۔