راہل گاندھی نے کیرالہ کی ایک نرس کی کہانی بتاتے ہوئے کہا، ‘ہمدردی، ہی کیرالہ کا جذبہ ہے

نئی دہلی، 26 مارچ (یو این آئی) لوک سبھا میں اپوزیشن لیڈر راہل گاندھی نے جمعرات کو اس اسپتال میں رات گزارنے کی ایک جذباتی تفصیل شیئر کی، جہاں ان کی والدہ سونیا گاندھی زیر علاج ہیں طبیعت خراب ہونے کے بعد محترمہ گاندھی کو دہلی کے ایک اسپتال میں داخل کرایا گیا ہے، جہاں ان کا علاج جاری ہے۔ مسٹر گاندھی نے بتایا کہ وہ رات بھر اپنی والدہ کے کمرے میں ایک صوفے پر لیٹے رہے اور ان کی صحت کے حوالے سے کافی فکر مند تھے۔مسٹر گاندھی نے کہا کہ اس مشکل وقت میں انہیں واحد تسلی کیرالہ کی ایک نرس سے ملی، جو باقاعدگی سے ان کی والدہ کی دیکھ بھال کر رہی تھیں اور مسکراہٹ کے ساتھ انہیں حوصلہ دے رہی تھیں۔ انہوں نے کہا، “پوری رات، مجھے صرف ایک ہی چیز سے سکون ملا – کیرالہ کی ایک نرس جو ہر گھنٹے میری ماں کو دیکھنے آتی تھیں۔ وہ مسکراتیں اور ماں کا ہاتھ تھام لیتی تھیں۔”کانگریس لیڈر نے ذکر کیا کہ نرس نے بغیر آرام کیے پوری رات کام کیا، جو ہندوستان اور بیرون ملک خدمات انجام دینے والے کیرالہ کے ہیلتھ ورکرز کے عزم کو ظاہر کرتا ہے۔مسٹر گاندھی نے صبح ان سے پوچھا کہ کیا انہیں نیند نہیں آتی، جس پر نرس نے جواب دیا کہ وہ پوری رات کام کرتی ہیں۔ انہوں نے کہا، “جب پوری دنیا سوتی ہے، کیرالہ کی خواتین… لوگوں کو دلاسہ دے رہی ہوتی ہیں، ان کا ہاتھ تھامے رکھتی ہیں اور انہیں پرسکون محسوس کراتی ہیں۔ میرے لیے، یہی ریاستِ کیرالہ کا اصل جذبہ ہے۔”مسٹر گاندھی نے اپنی والدہ کے ساتھ رہنے کے لیے کیرالہ اسمبلی انتخابات کے لیے اپنا مقررہ دورہ منسوخ کر دیا ہے۔ کانگریس ذرائع نے اشارہ دیا ہے کہ ان کے انتخابی پروگرام محترمہ گاندھی کی صحت یابی کے بعد دوبارہ ترتیب دیے جائیں گے۔