راہل گاندھی ’سنگٹھن سرجن ابھیان‘ کیلئےچنڈی گڑھ پہنچے

چنڈی گڑھ، 04 جون (یواین آئی) لوک سبھا میں اپوزیشن رہنما راہل گاندھی ہریانہ میں پارٹی کے ’سنگٹھن سرجن ابھیان‘ (تنظیم سازی مہم ) کے لئے چنڈی گڑھ پہنچ گئے ہیں۔ہوائی اڈے پر سابق وزیر اعلی بھوپیندر سنگھ ہڈا سمیت سینئر لیڈروں نے ان کا استقبال کیا۔ بعد میں مسٹر گاندھی نے کانگریس دفتر میں ہریانہ پردیش کانگریس کمیٹی کے لیڈروں کے ساتھ میٹنگ کی۔تقریباً آٹھ ماہ قبل اسمبلی انتخابات میں غیر متوقع شکست کے بعد سے ہریانہ میں پارٹی کی تنظیم کو پھر سے منظم کرنے کی بات ہو رہی ہے اور اسی سلسلے میں مسٹر گاندھی ہریانہ آئے ہیں۔ اس کے علاوہ ان کے کانگریس لیجسلیٹیو پارٹی لیڈر یعنی ہریانہ اسمبلی میں اپوزیشن لیڈر منتخب کیے جانے کا بھی امکان ہے۔ اس حوالے سے پارٹی کی جانب سے تشکیل دی گئی مبصرین کی کمیٹی نے اپنی رپورٹ اعلیٰ قیادت کو پیش کر دی ہے۔تنظیم سازی کے لیے مبصرین بھی مقرر کیے گئے ہیں جن میں سابق ایم ایل اے اور سابق ایم پی شامل ہیں۔اس دوران کانگریس جنرل سکریٹری اور سرسہ سیٹ سے رکن پارلیمنٹ کماری سیلجا نے صحافیوں سے بات کرتے ہوئے کہا کہ ہر کوئی چاہتا ہے کہ ایک تنظیم بنے، مسٹر گاندھی اس معاملے کو سنجیدگی سے لے رہے ہیں، اس لیے لیڈروں کو بھی اسے سنجیدگی سے لینا ہوگا۔