محمد ہدایت اللہ آل انڈیا کانگریس کمیٹی (او بی سی شعبہ) کے سوشل میڈیا کوآرڈی نیٹر مقرر

نئی دہلی، 31جولائی (یو این آئی) کانگریس کے فعال نوجوان لیڈر اور دہلی پردیش کانگریس کمیٹی کے سوشل میڈیاکے سابق چیرمین محمد ہدایت اللہ کو آل انڈیا کانگریس کمیٹی (او بی سی شعبہ) کا سوشل میڈیا کوآرڈی نیٹر مقرر کیا گیا ہے۔ یہ اطلاع آل انڈیا کانگریس کمیٹی (او بی سی شعبہ) کے چیرمین ڈاکٹر انل جے ہند کے دستخط سے جاری تقرری نامہ میں دی گئی ہے۔تقرری نامے میں کہا گیا ہے کہ آپ (محمد ہدایت اللہ) کو آل انڈیا کانگریس کمیٹی (او بی سی شعبہ) کا سوشل میڈیا کوآرڈی نیٹر مقرر کیا جاتا ہے۔ اس میں کہا گیا ہے کہ ہمیں اعتماد ہے کہ اپنی قیادت میں نمایاں طور پر کانگریس پارٹی کے اندر او بی سی تحریک کی نظریاتی بنیاد کو مضبوط بنانے میں اپنا اہم کردار ادا کریں گے۔اس میں مزید کہا گیا ہے کہ ہم کانگریس کے صدرملکا ارجن کھڑگے اور حزب اختلاف کے لیڈر راہل گاندھی کی معزز قیادت میں اس نئی ذمہ داری میں آپ کی فعال شمولیت اور قابل قدر شراکت کے منتظر ہیں۔اس کے علاوہ کانگریس پارٹی اور خاص طور پر حزب اختلاف کے قائد راہل گاندھی او بی سی کے معاملات کو سڑک سے لیکر پارلیمنٹ تک زور شور سے اٹھارہے ہیں اور انہوں نے ذات پات پر مبنی مردم شماری کرانے کی تحریک چھیڑ رکھی تھی جس کی وجہ حکومت بھی ذات پات پر مبنی مردم کرانے پر آمادہ ہوئی ہے۔واضح رہے کہ محمدہدایت اللہ اس سے قبل دہلی کانگریس کمیٹی کے سوشل میڈیا کے چیرمین تھے۔ اس کے علاوہ وہ نہایت فعال سماجی اور سیاسی کارکن ہیں۔ لوگوں کی مدد اور کام میں پیش پیش رہتے ہیں۔