کھڑگے اور راہل گاندھی نے آشا بھونسلے کے انتقال پر اظہارِ تعزیت کیا

نئی دہلی، 12 اپریل (یو این آئی) کانگریس صدر ملیکارجن کھڑگے اور لوک سبھا میں قائدِ حزبِ اختلاف راہل گاندھی نے عظیم پلے بیک سنگر آشا بھونسلے کے انتقال پر گہرے رنج و غم کا اظہار کیا ہے۔ملیکارجن کھڑگے نے کہا کہ آشا بھونسلے کے انتقال کے ساتھ ہی پلے بیک سنگنگ کا ایک عہد ختم ہو گیا۔ انہوں نے انہیں غیر معمولی ہمہ جہت صلاحیت اور وقار کی علامت قرار دیتے ہوئے کہا کہ ان کی گائیکی کو دنیا بھر میں بے حد سراہا گیا۔انہوں نے سوشل میڈیا پلیٹ فارم “ایکس” پر لکھا: “آشا بھونسلے کے انتقال کے ساتھ پلے بیک سنگنگ کے ایک دور کا خاتمہ ہو گیا ہے۔ وہ بے مثال ہمہ جہت صلاحیت اور وقار کی علامت تھیں۔ ان کی منفرد گائیکی کو دنیا بھر میں لاکھوں لوگوں نے پسند کیا۔ ‘پدم وبھوشن، سے نوازے جانے والی وہ تاریخ کی سب سے زیادہ ریکارڈ کی جانے والی گلوکاراؤں میں شامل ہیں۔ ہندی فلمی گانوں سے لے کر دل کو چھو لینے والی غزلوں، بھجنوں اور قوالیوں تک، انہوں نے کئی زبانوں میں اپنی آواز دی۔ ان کے اہلِ خانہ، دوستوں اور بے شمار مداحوں کے ساتھ میری دلی ہمدردیاں ہیں۔”وہیں، راہل گاندھی نے بھی تعزیت کرتے ہوئے کہا: “عظیم گلوکارہ آشا بھونسلے جی کے انتقال کی خبر انتہائی افسوسناک ہے۔ ان کی آواز کے ذریعے ان کا فن ہمیشہ ہمارے درمیان زندہ رہے گا۔ اس غم کی گھڑی میں میری ہمدردیاں ان کے اہلِ خانہ اور مداحوں کے ساتھ ہیں۔”قابلِ ذکر ہے کہ دادا صاحب پھالکے ایوارڈ سے نوازے جانے والی آشا بھونسلے کا 92 برس کی عمر میں ممبئی میں انتقال ہو گیا۔ انہیں سینے میں انفیکشن کے باعث بریچ کینڈی اسپتال میں داخل کرایا گیا تھا، جہاں انہوں نے اتوار کو آخری سانس لی۔