پیوش گوئل نے بھارت۔سوئٹزرلینڈ اقتصادی شراکت داری کو مزید گہرا کرنے کے لیے سوئس صنعتکاروں سے ملاقات کی
نئی دہلی /کوبرن ( سویٹزرلنڈ)10؍جون۔ ایم این این۔مرکزی وزیر برائے تجارت و صنعت جناب پیوش گوئل نے 9 جون 2025 کو برن، سوئٹزرلینڈ میں سوئس صنعت کے سرکردہ رہنماؤں سے تفصیلی ملاقاتیں کیں، جن کا مقصد بھارت اور سوئٹزرلینڈ کے درمیان اقتصادی تعاون کو مضبوط بنانا اور حال ہی میں بھارت اور یورپی فری ٹریڈ ایسوسی ایشن (ای ایف ٹی اے)کے درمیان دستخط شدہ تجارتی و اقتصادی شراکت داری معاہدے (ٹی ای پی اے)کے تحت نئے مواقع تلاش کرنا تھا۔وزیر موصوف نے مختلف شعبوں کی ممتاز سوئس کمپنیوں کی قیادت سے ملاقات کی، جہاں بھارتی اور سوئس اداروں کے درمیان باہمی ہم آہنگی کو بڑھانے پر بات چیت ہوئی، خاص طور پر جدت، ٹیکنالوجی کی منتقلی اور پائیدار مینوفیکچرنگ پر زور دیا گیا۔ انہوں نے سوئس کمپنیوں کو بھارت میں اپنی موجودگی کو وسعت دینے اور ملک کی متحرک اور تیزی سے ترقی کرتی ہوئی مارکیٹ سے فائدہ اٹھانے کی بھرپور دعوت دی۔جناب گوئل نے سوئس قیادت کو یقین دلایا کہ بھارت کاروبار کے لیے سازگار ماحول فراہم کرنے کے لیے پرعزم ہے، جس میں شفاف ضابطہ جاتی عمل، مضبوط دانشورانہ املاک کا نظام، اور سرمایہ کاری دوست پالیسی فریم ورک شامل ہیں۔ انہوں نے سوئس کاروباری برادری پر زور دیا کہ وہ بھارت کو صرف ایک مارکیٹ کے طور پر نہیں بلکہ مینوفیکچرنگ، مہارت اور اختراع کے ایک اسٹریٹجک مرکز کے طور پر دیکھیں۔ان اسٹریٹجک بات چیت کے بعد، وزیر موصوف نے سوئس صنعت کے مختلف شعبوں سے تعلق رکھنے والے قائدین کے ساتھ دو خصوصی گول میز اجلاسوں کی صدارت کی— جن میں بایوٹیک اور فارما، صحت عامہ، پریسیژن انجینئرنگ، دفاع اور ابھرتی ہوئی ٹیکنالوجیز جیسے شعبے شامل تھے۔ یہ اجلاس بھارتی سفارتخانے کی معاونت سے منعقد کیے گئے، جن میں بھارت کی وسعت، کم لاگت مواقع اور ابھرتے ہوئے اختراعی نظام کو اجاگر کیا گیا۔وزیر موصوف نے سوئس کاروباری اداروں پر زور دیا کہ وہ ‘‘انوَسٹ انڈیا’’ میں قائم ای ایف ٹی اے ڈیسک سے مکمل رہنمائی اور سہولت حاصل کریں۔ انہوں نے ضابطہ جاتی ہم آہنگی اور باہمی شناختی معاہدوں کے لیے بھارت کی آمادگی کا اعادہ کیا، اور سرمایہ کاری کو فروغ دینے کے لیے دونوں ممالک کے درمیان باہمی تعلقات کو مستحکم کرنے میں بھارت کے فعال کردار کو نمایاں کیا۔مرکزی وزیر تجارت اور صنعت پیوش گوئل نے پیر کو کہا کہ ہندوستان اور چار ملکی یورپی بلاک ای ایف ٹی اے کے درمیان آزاد تجارتی معاہدہ (ایف ٹی اے( ستمبر سے نافذ ہونے کا امکان ہے۔10 مارچ 2024 کو دونوں فریقوں نے تجارتی اور اقتصادی شراکت داری کے معاہدے (TEPA) پر دستخط کیے۔ معاہدے کے ایک حصے کے طور پر، ہندوستان نے بلاک سے 15 سالوں میں 100 بلین ڈالر کی سرمایہ کاری کا وعدہ حاصل کیا، جبکہ سوئس گھڑیاں، چاکلیٹ، اور کٹے ہوئے اور پالش شدہ ہیروں سمیت مختلف مصنوعات پر ڈیوٹی کم کرنے یا ختم کرنے پر اتفاق کیا۔یورپی فری ٹریڈ ایسوسی ایشن (EFTA) کے ارکان آئس لینڈ، لیختنسٹین، ناروے اور سوئٹزرلینڈ ہیں۔ تجارتی معاہدے کے نافذ ہونے کے بعد، کئی مصنوعات جیسے سوئس گھڑیاں، سوئس چاکلیٹ، بسکٹ اور کٹ اور پالش شدہ ہیرے چار یورپی ممالک سے کم یا صفر ڈیوٹی پر آئیں گے۔گوئل نے کہا کہ اس معاہدے کو چاروں ممالک کی پارلیمنٹ سے منظوری مل گئی ہے۔ سوئٹزرلینڈ میں، 10 جولائی تک اعتراض کی مدت کھلی ہے کیونکہ وہاں جولائی اور اگست چھٹیوں کے مہینے ہوتے ہیں۔ انہوں نے یہ اعلان دونوں ممالک کے درمیان تجارت اور سرمایہ کاری کو فروغ دینے کے لیے سوئٹزرلینڈ کے سرکاری دورے کے دوران کیا۔ہندوستان نے وعدہ کیا تھا کہ وہ EFTA ممالک سے 80-85% اشیا پر ٹیرف کو صفر کر دے گا۔ دوسری طرف، چار یورپی ممالک نے چاول سمیت تقریباً 99 فیصد ہندوستانی اشیا کے لیے ڈیوٹی فری مارکیٹ رسائی کی اجازت دینے پر اتفاق کیا ہے۔1960 میں تشکیل دی گئی، یورپی فری ٹریڈ ایسوسی ایشن (EFTA) ایک بین الحکومتی تنظیم ہے۔ یہ ان یورپی ریاستوں کے لیے ایک متبادل تجارتی بلاک کے طور پر قائم کیا گیا تھا جو یورپی یونین میں شامل ہونے سے قاصر یا تیار نہیں تھیں۔چار ممالک – آئس لینڈ، لیچٹنسٹائن، ناروے اور سوئٹزرلینڈ – یورپی یونین کا حصہ نہیں ہیں لیکن مختلف معاہدوں کے ذریعے اس کی واحد مارکیٹ تک رسائی حاصل کرتے ہیں۔
