اپوزیشن کے تمام 10 ارکان پارلیمنٹ معطل
نئی دہلی، 24 جنوری:۔ (ایجنسی) وقف بل پر قائم مشترکہ کمیٹی نے جمعہ کو میٹنگ کی۔ معلومات کے مطابق، ترنمول کانگریس کے رکن پارلیمنٹ کلیان بنرجی اور بی جے پی رکن پارلیمنٹ نشی کانت دوبے کے درمیان اس میٹنگ میں زبردست ہنگامہ ہوا۔ جس کے باعث اجلاس ملتوی کر دیا گیا۔ معلوم ہوا ہے کہ کلیان بنرجی نے میٹنگ پر سوالات اٹھائے ہیں۔ نشی کانت دوبے نے اس پر اعتراض کیا۔ پھر دونوں کے درمیان بحث شروع ہو گئی۔ تنازعہ اتنا بڑھ گیا کہ اجلاس ملتوی کر دیا گیا۔ اس کے ساتھ ہی اپوزیشن کے 10 ارکان پارلیمنٹ کو دن کے لیے معطل کر دیا گیا۔ معطل ارکان میں کلیان بنرجی، محمد جاوید، اے راجہ، اسد الدین اویسی، ناصر حسین، محب اللہ، ایم عبداللہ، اروند ساونت، ندیم الحق، عمران مسعود شامل ہیں۔ اگلا اجلاس 27 جنوری کو ہوگا۔ قبل ازیں، جیسے ہی وقف (ترمیمی) بل پر مشترکہ پارلیمانی کمیٹی (جے پی سی) کا اجلاس شروع ہوا، متحدہ مجلس عمل کے میر واعظ عمر فاروق نے جمعہ کو امید ظاہر کی کہ وقف کے معاملے پر جلد بازی میں کوئی فیصلہ نہیں کیا جائے گا۔ ملک میں بہت زیادہ کشیدگی ہے مسلمان بے بس محسوس کر رہے ہیں۔ انہوں نے کہا کہ وقف بورڈ کا مسئلہ اس لئے اہم ہے کہ یہ مسلمانوں کے مستقبل سے جڑا ہوا ہے۔ انہوں نے کہا کہ انہوں نے ایک میمورنڈم تیار کیا ہے اور مرحلہ وار اپنے خدشات پر بات کرنے کا منصوبہ بنایا ہے۔ فاروق نے کہا کہ چونکہ جموں و کشمیر ایک مسلم اکثریتی ریاست ہے، اس لیے لوگوں کو بہت سے تحفظات ہیں۔ کئی مسائل ہیں، اور ہم ان پر مرحلہ وار بحث کریں گے۔ ہم امید کرتے ہیں کہ جے پی سی کے اراکین ہماری طرف سے اٹھائے گئے خدشات کو سمجھیں گے اور ان کا ازالہ کریں گے کیونکہ یہ معاملہ مسلمانوں کے مستقبل سے براہ راست جڑا ہوا ہے۔انہوں نے کہا کہ آپ دیکھ سکتے ہیں کہ جب مسجدوں اور مندروں کی بات آتی ہے تو پہلے ہی کشیدگی کا ماحول ہے۔ ہم سمجھتے ہیں کہ ایسا کوئی قدم نہیں اٹھایا جانا چاہیے جس سے بھائی چارے کی فضا کو نقصان پہنچے۔ ہمارا خیال تھا کہ جے پی سی کشمیر آئے گی۔ ہم یہاں بہت کم وقت کے لیے آئے ہیں۔منگل کو اتر پردیش کے لکھنؤ میں ملاقات کے بعد جے پی سی کے چیئرمین جگدمبیکا پال نے کہا کہ یہ جے پی سی کی آخری میٹنگ ہوگی اور اس کے بعد وہ 31 جنوری کو بجٹ اجلاس کے دوران پارلیمنٹ میں اپنی رپورٹ پیش کریں گے۔
