ای وی ایم کے ساتھ وی وی پیٹ مشین کی پرچیوں کا 100 فیصد ملان کرائے جانے سے متعلق عرضی پر جلد سماعت کے لیے سپریم کورٹ راضی ہو گیا ہے۔ اس معاملے میں دو ہفتوں بعد کی کوئی تاریخ فہرست بند کی جا سکتی ہے۔ جسٹس سنجیو کھنہ کی صدارت والی بنچ نے اس تعلق سے آج کہا کہ اے ڈی آر کی طرف سے داخل کی گئی عرضی اگلے کے اگلے ہفتہ فہرست بند کی جائے گی۔
عرضی دہندہ ادارہ اے ڈی آر کی طرف سے سپریم کورٹ میں پیش ہوئے وکیل پرشانت بھوشن نے آج مطالبہ کیا تھا کہ عرضی پر جلد سماعت کی جائے۔ سینئر ایڈووکیٹ کپل سبل نے بھی بنچ سے گزارش کی کہ اس معاملے پر آئندہ ہفتہ منگل کے روز سماعت کی جا سکتی ہے۔ علاوہ ازیں سینئر وکیل گوپال شنکر نارائن نے کہا کہ انتخاب قریب ہے اور اگر اس معاملے پر جلد سماعت نہیں ہوئی تو عرضی بے معنی ہو جائے گی۔
وکلا کی گزارش پر جسٹس کھنہ کے علاوہ جسٹس ایم ایم سندریش اور جسٹس بیلا ایم ترویدی پر مشتمل بنچ نے کہا کہ وہ حالات سے واقف ہیں اور اگلے کے اگلے ہفتہ اس معاملے پر سماعت کریں گے۔ قابل ذکر بات یہ ہے کہ سپریم کورٹ نے گزشتہ روز ہی وی وی پیٹ پرچی اور ای وی ایم سے ملان معاملے پر داخل ایک دیگر عرضی پر انتخابی کمیشن اور مرکزی حکومت کو نوٹس بھیج کر جواب مانگا تھا۔
