9 سال بعد بھی سوال باقی ،کیا نوٹ بندی سے مقصد حاصل ہوا؟

نئی دہلی، 9 نومبر:۔ (ایجنسی)9 سال قبل، 8 نومبر 2016 کی وہ رات تھی جب وزیر اعظم مودی نے رات 8 بجے قوم سے ٹی وی پر خطاب کیا اور 500 اور 1000 روپے کے نوٹ بند کرنے کا اعلان کیا۔ وہ اعلان آج بھی عوام کے ذہنوں میں تازہ ہے۔ اس فیصلے نے نہ صرف بازار اور بینکنگ نظام کو ہلا کر رکھ دیا بلکہ عام شہریوں کی روزمرہ زندگی کو بھی شدید متاثر کیا۔ شہری دن بھر قطاروں میں کھڑے ہو کر نوٹ تبدیل کرواتے رہے۔ حکومت کا دعویٰ تھا کہ اس قدم کا مقصد کالا دھن، دہشت گردی کی فنڈنگ اور جعلی کرنسی پر قابو پانا ہے۔9 سال گزرنے کے بعد بھی سوال یہ ہے کہ کیا حکومت نے نوٹ بندی کے ذریعے اپنا مقصد حاصل کر لیا؟ ہندی نیوز پورٹل ’آج تک‘ کی رپورٹ کے مطابق، سرکاری اعداد و شمار بتاتے ہیں کہ بند کیے گئے 15.44 لاکھ کروڑ روپے میں سے تقریباً 15.31 لاکھ کروڑ روپے بینکوں میں واپس جمع ہو گئے، یعنی 99 فیصد سے زیادہ رقم نظام میں واپس آگئی۔ اس سے یہ بات مضبوط ہوئی کہ کالا دھن ختم نہیں ہوا بلکہ بینکنگ نظام کے ذریعے ’سفید‘ ہو گیا۔ اس دوران بینکوں اور اے ٹی ایم کے باہر طویل قطاروں میں کئی افراد کی موت بھی ہوئی۔ چھوٹے کاروبار، غیر منظم شعبے اور دیہی معیشت کو بڑا دھچکا لگا۔ ماہرین معیشت کے مطابق، نوٹ بندی کے بعد جی ڈی پی میں نمایاں کمی دیکھی گئی اور چھوٹے صنعت کاروں کو سنبھلنے میں برسوں لگ گئے۔نوٹ بندی کے فوراً بعد حکومت نے 2000 روپے کا نیا نوٹ جاری کیا تاکہ نقدی کی کمی کو پورا کیا جا سکے، لیکن 2023 میں ریزرو بینک نے انہی 2000 روپے کے نوٹوں کو بھی چلن سے ہٹا دیا۔ یوں لگتا ہے جیسے نوٹ بندی کے فیصلے نے خود اپنی سمت بدل لی۔ ایک پہلو سے حکومت اسے بڑی کامیابی کے طور پر پیش کرتی ہے کیونکہ اس سے ڈیجیٹل لین دین تیزی سے بڑھا۔ نوٹ بندی کے بعد لوگوں نے آن لائن ادائیگی کے طریقے اپنانا شروع کیے۔ پے ٹی ایم، فون پے اور گوگل پے جیسی ایپس نے روزمرہ لین دین کو آسان بنا دیا۔ آج ملک میں یو پی آئی کے ذریعے روزانہ 14 کروڑ سے زیادہ ٹرانزیکشن ہوتے ہیں۔ماہرین کا کہنا ہے کہ صرف نوٹ بندی کو اس تبدیلی کا کریڈٹ دینا درست نہیں۔ گزشتہ چند برسوں میں انٹرنیٹ تک عام رسائی، اسمارٹ فونز کے پھیلاؤ اور آن لائن سہولیات نے بھی اس رجحان کو بڑھایا ہے۔