راجیہ سبھا میں کانشی رام کو بھارت رتن دینے کا مطالبہ، دیگر اہم مسائل بھی زیرِ بحث

نئی دہلی، 24 مارچ (یو این آئی) راجیہ سبھا میں منگل کے روز بہوجن سماج پارٹی کے بانی کانشی رام کو ملک کا اعلیٰ ترین شہری اعزاز ’بھارت رتن‘ دینے کا مطالبہ زور و شور سے اٹھایا گیا۔سماج وادی پارٹی کے رکن رام جی لال سمن نے وقفۂ صفر کے دوران یہ معاملہ اٹھاتے ہوئے کہا کہ کانشی رام نے ملک کے اکثریتی محروم طبقے کے لیے غیر معمولی خدمات انجام دی ہیں۔ انہوں نے بتایا کہ کانشی رام نے سرکاری ملازمت چھوڑ کر سماج کے پسماندہ طبقات کو ان کے حقوق دلانے کے لیے بیداری مہم چلائی اور انہیں باعزت زندگی گزارنے کی ترغیب دی۔ انہوں نے یہ بھی کہا کہ اتر پردیش کے سابق وزیر اعلیٰ اکھلیش یادو بھی کئی مواقع پر انہیں بھارت رتن دینے کا مطالبہ کر چکے ہیں۔اسی دوران شیو سینا (ادھو) کی رکن پرینکا چترویدی نے جانوروں کے خلاف بڑھتی ہوئی بے رحمی پر تشویش ظاہر کرتے ہوئے کہا کہ موجودہ قانون کے تحت ایسے جرائم پر صرف 50 روپے جرمانہ عائد کیا جاتا ہے جو انتہائی ناکافی ہے۔ انہوں نے کہا کہ ایک زخمی جانور کے علاج پر کم از کم 5000 روپے خرچ آتے ہیں، لہٰذا ایسے جرائم پر جرمانہ بڑھایا جائے اور سخت کارروائی کی جائے۔کانگریس کی رکن پھولو دیوی نیتام نے رائے پور کے ایمس اسپتال میں ڈاکٹروں اور عملے کی شدید کمی کا مسئلہ اٹھایا۔ انہوں نے بتایا کہ وہاں 305 ڈاکٹروں کے عہدے منظور شدہ ہیں لیکن صرف 190 ڈاکٹر خدمات انجام دے رہے ہیں۔ اسی طرح نرسنگ اور تکنیکی عملے کے 3800 عہدوں کے مقابلے میں تقریباً 2400 افراد ہی کام کر رہے ہیں، جس کے باعث مریضوں کے علاج میں تاخیر ہو رہی ہے۔ انہوں نے مطالبہ کیا کہ خالی اسامیوں کو جلد از جلد پُر کیا جائے۔عام آدمی پارٹی کے رہنما سنجے سنگھ نے دہلی کے پالم علاقے میں حالیہ آتشزدگی کے واقعے میں نو افراد کی ہلاکت کا معاملہ اٹھاتے ہوئے الزام لگایا کہ اس میں سرکاری نظام کی لاپرواہی شامل ہے۔ انہوں نے مطالبہ کیا کہ اس واقعے کی مقررہ وقت میں تحقیقات کر کے ذمہ داروں کے خلاف سخت کارروائی کی جائے اور دہلی حکومت کے ایک وزیر کے بیان کا حوالہ دیتے ہوئے کہا کہ ان کے خلاف بھی کارروائی ہونی چاہیے۔ملک میں قبائلیوں اور دلتوں کے خلاف جرائم کی بڑھتی ہوئی تعداد کا حوالہ دیتے ہوئے کانگریس پارٹی کے مکل واسنک نے کہا کہ قبائلی برادری کے ارکان کے خلاف جرائم کے اوسطاً 36 واقعات اور دلت برادری کے ارکان کے خلاف 158 واقعات روزانہ ہوتے ہیں۔ انہوں نے بتایا کہ اس وقت تقریباً 90 فیصد ایسے کیسز عدالتوں میں زیر التوا ہیں۔ ممبر نے مزید نشاندہی کی کہ ان مقدمات میں سزا کی شرح 30 فیصد سے کم ہے جبکہ مجرموں کی بریت کی شرح تقریباً 60 فیصد ہے۔ کانگریس کے رکن نے مزید کہا کہ ملک میں خصوصی عدالتوں کی شدید کمی ہے جو اس طرح کے مقدمات کا فیصلہ کرنے کے لیے وقف ہیں۔سماج وادی پارٹی کے پروفیسر رام گوپال یادو نے مطالبہ کیا کہ اتر پردیش کے اٹاوہ ضلع میں گوالیار نیشنل ہائی وے کے قریب کان کنی مافیا کی سرگرمیوں پر روک لگائی جائے۔بیجو جنتا دل کی سلتا دیو نے بچوں کے خلاف جرائم کو ختم کرنے کی ایک پرزور درخواست کی، خاص طور پر بچوں کی اسمگلنگ کو روکنے کی ضرورت کو اجاگر کیا۔