پارٹی کےدو روزہ ور کشاپ میںمودی آخری صف میں نظر آئے
نئی دہلی، 7 ستمبر (یو این آئی ) بھارتیہ جنتا پارٹی (بی جے پی) کی دو روزہ ورکشاپ میں اتوار کو جی ایس ٹی میں تاریخی اصلاحات کے لیے وزیر اعظم نریندر مودی کو مبارکباد اور شکریہ ادا کیا گیا، جہاں وہ ایک عام کارکن کی طرح ورکشاپ کی آخری قطار میں آرام سے بیٹھے نظر آئے۔بی جے پی کی دو روزہ ورکشاپ اتوار کو صبح 11 بجے پارلیمنٹ کے جی ایم سی بالیوگی آڈیٹوریم میں شروع ہوئی۔ وزیر اعظم نریندر مودی، وزیر داخلہ امت شاہ اور بی جے پی صدر جے پی نڈا کے ساتھ پارٹی کے سینئر لیڈروں اور ممبران پارلیمنٹ نے اس ورکشاپ میں حصہ لیا۔ اس ورکشاپ میں نائب صدر کے انتخاب کی تیاری اور ترقی یافتہ ہندوستان سمیت کئی مسائل پر تبادلہ خیال کیا جانا ہے۔اس ورکشاپ میں بی جے پی ممبران پارلیمنٹ نے 15 اگست کو لال قلعہ کی فصیل سے جی ایس ٹی اصلاحات کے اعلان کو عملی جامہ پہنانے کے لیے ایک قرارداد پاس کرکے وزیر اعظم کو مبارکباد دی اوران کا شکریہ ادا کیا۔بی جے پی کی دو روزہ ورکشاپ کے پہلے دن ارکان پارلیمنٹ کے لیے چار اہم سیشن ہوں گے۔ پہلا سیشن آتم نربھر بھارت، سودیشی بھارت اور نوجوانوں کی طاقت اور روزگار پر ہوگا۔ دوسرا اجلاس ارکان پارلیمنٹ کی جانب سے سوشل میڈیا کے موثر استعمال پر ہوگا۔ تیسرا اجلاس ارکان پارلیمنٹ کی قائمہ کمیٹی کے گروپوں سے متعلق ہے جس کا تعلق مختلف وزارتوں کی پارلیمانی کمیٹیوں سے ہے۔اس میں پارلیمانی کمیٹی کی کارروائی کی اہمیت، پارلیمنٹ کے اجلاس کی تیاری، پارلیمانی دستورالعمل کے استعمال، وزارت کی رپورٹس کا مطالعہ اور بطور رکن پارلیمنٹ رویہ اور احتیاطی تدابیر پر بات چیت ہوگی۔ چوتھے اور آخری سیشن میں سمندری علاقہ، بائیں بازو کا علاقہ، دیہی علاقہ، شہری علاقہ اور پہاڑی اور شمال مشرقی علاقہ کے بارے میں بات چیت ہوگی۔بی جے پی ورکشاپ کے دوسرے دن پیر کو بی جے پی ممبران پارلیمنٹ کو انتخابی عمل، ووٹ ڈالنے کے طریقہ کار اور 9 ستمبر کو ہونے والے نائب صدر کے انتخاب کے لیے احتیاطی تدابیر کے بارے میں تربیت دی جائے گی۔معلوم ہوا ہے کہ نائب صدر کے انتخاب کے لیے این ڈی اے کے امیدوار سی پی رادھا کرشنن اور انڈیا اتحاد کے امیدوار جسٹس بی سدرشن ریڈی کے درمیان مقابلہ ہے۔
ذرائع کے مطابق بی جے پی ورکشاپ میں پیوش گوئل نے جی ایس ٹی اصلاحات سے متعلق تحریک تشکر پیش کی۔ اس کے بعد اراکین پارلیمنٹ نے جی ایس ٹی اصلاحات کی حمایت میں ایک قرارداد پاس کی۔ اراکین پارلیمنٹ نے جی ایس ٹی اصلاحات کے لیے وزیر اعظم کا شکریہ بھی ادا کیا۔ دراصل، جی ایس ٹی میں اصلاحات سے لوگوں پر ٹیکس کا بوجھ کم ہوگا اور معیشت کو فروغ ملے گا۔ بی جے پی اور اس کے اتحادیوں کو امید ہے کہ اس اقدام سے انہیں نومبر میں ہونے والے بہار انتخابات میں برتری ملے گی۔اس دو روزہ ورکشاپ میں کئی سیشنز کا انعقاد کیا جا رہا ہے۔ ان اجلاسوں میں پارٹی کی تاریخ اور ترقی کے ساتھ ساتھ ارکان پارلیمنٹ کی کارکردگی بڑھانے کے طریقوں پر بھی بات کی جائے گی۔پنجاب اور ملک کے دیگر حصوں میں سیلاب سے ہونے والی تباہی کے پیش نظر قومی جمہوری اتحاد (این ڈی اے) کے اراکین پارلیمنٹ کے لیے 8 ستمبر کو وزیر اعظم نریندر مودی کی سرکاری رہائش گاہ پر منعقد ہونے والے عشائیہ کو منسوخ کر دیا گیا ہے۔ قبل ازیں، ہفتہ کو بی جے پی کے قومی صدر اور مرکزی وزیر جے پی نڈا کی طرف سے ارکان پارلیمنٹ کے لیے عشائیہ منسوخ کر دیا گیا تھا۔
