کارتی چدمبرم کے خلاف چینی ویزا گھوٹالے میں راؤز ایوینیو کورٹ سے الزامات طے

نئی دہلی، 23 دسمبر (یو این آئی) راؤز ایوینیو کورٹ نے منگل کے روز کانگریس لیڈر کارتی چدمبرم اور ان کے چارٹرڈ اکاؤنٹنٹ ایس بھاسکرارمن کے خلاف مرکزی تفتیشی بیورو (سی بی آئی) کے ذریعہ جانچ کیے جانے والے مبینہ چینی ویزا گھوٹالے میں الزامات طے کیے عدالت نے بھاسکرارمن پر کیس سے متعلق اہم شواہد کو تباہ کرنے کا بھی الزام لگایا۔ دونوں ملزمان خود کو بے قصور بتایا جس کے بعد عدالت نے اگلی سماعت کی تاریخ 16 جنوری کو مقرر کی۔سی بی آئی نے وکاس مکھریا کو سرکاری گواہ کا درجہ دیا ہے، جن سے استغاثہ کو مقدمے میں ان کے کلیدی کردار ادا کرنے کی امید ہے۔ سی بی آئی کی ایف آئی آر کے مطابق، مانسہ، پنجاب میں واقع پرائیویٹ کمپنی (تلونڈی سابو پاور لمیٹڈ) نے مبینہ طور پر چینی شہریوں کے لیے ویزے کے اجرا میں آسانی کے لیے بچولیوں کے ذریعے 50 لاکھ روپے ادا کیے تھے۔یہ کمپنی 1,980 میگاواٹ کا تھرمل پاور پلانٹ لگا رہی تھی، جس کی تعمیر چینی کمپنی کو آؤٹ سورس کی گئی تھی۔ پروجیکٹ میں تاخیر کی وجہ سے، کمپنی نے مبینہ طور پر وزارت داخلہ کی طرف سے مقرر کردہ ویزا کی حد سے زیادہ چینی پیشہ ور افراد کو لانے کی کوشش کی۔سی بی آئی کے حکام نے اطلاع دی کہ ان پابندیوں کو روکنے کے لیے کمپنی کے نمائندوں نے اپنے ساتھیوں کے ذریعے چنئی میں مقیم ایجنٹ سے رابطہ کیا۔ یہ الزام لگایا گیا ہے کہ یہ منصوبہ 263 پروجیکٹ ویزا کو دوبارہ استعمال کرنے کا تھا جو پہلے چینی حکام کو دیے گئے تھے، جس سے وزارت داخلہ کی مقرر کردہ حد کی خلاف ورزی ہوئی تھی۔اس کے بعد ویزے کو دوبارہ استعمال کرنے کی منظوری کے لیے وزارت داخلہ کو درخواست پیش کی گئی جس پر ایک ماہ کے اندر منظوری دے دی گئی۔ تفتیش کاروں کے مطابق، چنئی میں مقیم شخص نے 50 لاکھ کی رشوت طلب کی، جو پنجاب کی فرم نے ادا کی۔الزام ہے کہ یہ رقم ممبئی کی ایک کمپنی کے ذریعے کنسلٹنسی اور ویزا سے متعلق کام کے اخراجات کے ضمن میں منتقل کی گئی۔ سی بی آئی کا دعویٰ ہے کہ ممبئی کی فرم کا ویزا کے عمل میں کوئی کردار نہیں تھا۔ایجنسی نے مزید الزام لگایا ہے کہ کارتی چدمبرم کے والد، سینئر کانگریس لیڈر اور سابق مرکزی وزیر پی چدمبرم نے نافذ کردہ قوانین کی خلاف ورزی کرتے ہوئے چینی شہریوں کے لیے ویزا دلانے میں مدد کی۔