سپریم کورٹ نے سخت ردعمل ظاہر کرتے ہوئے درخواست مسترد کر دی
نئی دہلی، 21 اپریل (یو این آئی): سپریم کورٹ نے مرشد آباد میں وقف (ترمیمی) ایکٹ کے خلاف احتجاج کے دوران مبینہ طور پر شروع ہونے والے فرقہ وارانہ اور سیاسی تشدد کے پیش نظر مغربی بنگال میں صدر راج نافذ کرنے اور نیم فوجی دستوں کی فوری تعیناتی کی درخواست پر کوئی فوری ہدایت دینے سے آج انکار کردیا جسٹس بی آر گوئی اور آگسٹین جارج مسیح پر مشتمل بنچ کے سامنے اس معاملے کی فوری سماعت کے لئے اسے لسٹ کیا گیا تھا۔ایڈوکیٹ وشنو شنکر جین، درخواست گزار کی طرف سے پیش ہوئے، عدالت عظمی سے ریاست میں جاری تشدد کو اجاگر کرنے کے لیے اضافی دستاویزات دائر کرنے کی اجازت طلب کی اور آئین کے آرٹیکل 355 کے فوری نفاذ کی اپیل کی ۔ایڈوکیٹ جین نے کہا " ریاست میں نیم فوجی دستوں کی فوری تعیناتی کی ضرورت ہے۔ یہ معاملہ کل سماعت کے لیے لسٹ کیا گیا ہے۔ میں نے آرٹیکل 355 کی درخواست کے لیے ایک اضافی درخواست دائر کی ہے " ۔اس درخواست پر سخت ردعمل ظاہر کرتے ہوئے جسٹس گوئی نے سوال کیا "آپ چاہتے ہیں کہ ہم صدر راج نافذ کرنے کے لیے صدر کو رٹ آف مینڈیمس جاری کریں؟ جیسا کہ ہم پر قانون سازی اور ایگزیکٹو ڈومینز میں دخل اندازی کا الزام ہے۔"جج موصوف حالیہ معاملات میں عدالت عظمی کو درپیش تنقید کا حوالہ دے رہے تھے، جس میں ایک کیس بھی شامل ہے جہاں اس نے گورنر اور صدر کو ریاستی بلوں پر مقررہ وقت کے اندر کام کرنے کی ہدایت دی تھی، جس سے عدالتی اوورریچ پر ایک بڑی بحث چھڑ گئی تھی۔عدات سے مداخلت کی تازہ درخواستیں عرضی گزار ششانک شیکھر جھا کی زیر التوا رٹ پٹیشن میں دائر کی گئی ہیں، جس میں مغربی بنگال میں تشدد کی تحقیقات کے لیے عدالت کی نگرانی والی خصوصی تحقیقاتی ٹیم (ایس آئی ٹی) کی تشکیل کا مطالبہ کیا گیا ہے۔مغربی بنگال کے رہنے والے دیو دتہ ماجد کی ایک دیگر درخواست میں جھڑپوں کی تحقیقات کے لیے سپریم کورٹ کے ایک ریٹائرڈ جج کی سربراہی میں تین رکنی کمیٹی کی تشکیل کا مطالبہ کیا گیا ہے۔بنچ نے سپریم کورٹ اور چیف جسٹس آف انڈیا کو نشانہ بنانے والے ان کے ریمارکس پر بھارتیہ جنتا پارٹی (بی جے پی ) کے ممبران پارلیمنٹ نشی کانت دوبے اور دنیش شرما کے خلاف توہین عدالت کی کارروائی شروع کرنے کی اجازت کے لئے ایک الگ زبانی تذکرے کی بھی سماعت کی ۔تاہم، عدالت نے درخواست گزار کو ہدایت دی کہ وہ آگے بڑھنے سے پہلے ہندوستان کے اٹارنی جنرل کی رضامندی حاصل کرے۔اس معاملے کی اگلی سماعت 22 اپریل کو ہو گی۔سپریم کورٹ نے حال ہی میں تمل ناڈو کے گورنر کو آئینی قواعد کی یاد دہانی کرائی ہے۔ سپریم کورٹ نے تبصرہ کیا کہ گورنر ریاستی اسمبلی کے منظور کردہ بل پر غیر معینہ مدت تک روک نہیں لگا سکتے۔ جسٹس جے بی پاردی والا اور جسٹس آر مہادیون کی سپریم کورٹ بنچ نے تبصرہ کیا کہ یہ واضح کرنے کی ضرورت ہے کہ اگر کوئی آئینی اتھارٹی ایک مخصوص مدت کے اندر کام کرنے میں ناکام رہتی ہے تو عدالت مداخلت کرنے سے گریز نہیں کرے گی۔ اس کے بعد سپریم کورٹ نے بھی صدر کو ڈیڈ لائن دیتے ہوئے کہا کہ انہیں کسی بھی بل پر تین ماہ کے اندر فیصلہ کرنا ہوگا۔ عام طور پر، جب کوئی بل ریاستی مقننہ سے منظور ہوتا ہے، تو اسے منظوری کے لیے گورنر کے پاس بھیجا جاتا ہے۔ اگر گورنر مقررہ وقت کے اندر بل پر فیصلہ نہیں لے سکتا تو وہ اسے صدر کے پاس بھیج دیتا ہے۔ سپریم کورٹ نے کہا ہے کہ اگر ایسا کوئی بل گورنر کی طرف سے آتا ہے تو صدر اسے غیر معینہ مدت کے لیے ملتوی نہیں کر سکتے ہیں۔بی جے پی کے رکن پارلیمنٹ نشی کانت دوبے نے کہاکہ سپریم کورٹ اپنی حدود سے تجاوز کر رہی ہے۔اگر کسی کو تمام معاملات کے لیے سپریم کورٹ جانا ہے تو پارلیمنٹ اور ریاستی اسمبلیوں کو بند کر دینا چاہیے۔‘‘ گوڈا سے بی جے پی کے رکن پارلیمنٹ نے یہ سوال بھی اٹھایا کہ سپریم کورٹ صدر کے لیے آخری تاریخ کیسے طے کرسکی ہے۔ دوبے نے ترمیم شدہ وقف ایکٹ پر سپریم کورٹ کے حکم پر بھی تبصرہ کیا۔ ترمیم شدہ وقف ایکٹ کے آئینی جواز کو چیلنج کرتے ہوئے سپریم کورٹ میں کئی مقدمات دائر کیے گئے ہیں۔ اس صورت میں، مرکز نے قانون کے کچھ حصوں کو عارضی طور پر معطل کرنے کی تجویز پیش کی۔ سپریم کورٹ نے اتفاق کیا اور قانون کے کچھ حصوں کو معطل کردیا۔ اس تناظر میں دوبے نے کہاکہ جب رام مندر، کرشن جنم بھومی یا گیانویتا کا معاملہ آتا ہے، تو آپ (سپریم کورٹ) کہتے ہیں، کاغذ دکھائیں۔” ملک میں مغلوں کے آنے کے بعد بنی مسجد کا موضوع آیا تو فرمایا کہ کاغذ کیسے دکھا سکتے ہو؟ سپریم کورٹ ملک میں مذہبی جنگ برپا کرنا چاہتی ہے۔
