14 لاشیں لواحقین کو سونپی گئیں؛ ڈی این اے کے نمونوں سے لاشوں کی شناخت کا عمل جاری
احمد آباد، 15 جون:۔ (ایجنسی) احمد آباد ایئر انڈیا طیارہ حادثے میں ہلاک ہونے والے افراد کی شناخت کا عمل مسلسل جاری ہے۔ ڈی این اے ٹیسٹ کے ذریعے جاں بحق ہونے والوں کی شناخت ان کے ڈی این اے نمونوں کو ان کے اہل خانہ کے نمونوں سے ملا کر کی جا رہی ہے ۔ اب تک 34 لاشوں کی شناخت ہو چکی ہے، جن میں سے 14 لاشیں متعلقہ رشتہ داروں اور لواحقین کے حوالے کی جا چکی ہیں۔ باقی لاشوں کو حوالے کرنے کا عمل جاری ہے۔گجرات کے سابق وزیراعلیٰ وجے روپانی کا ڈی ین اے میچ ہوگیا ہے۔ وہیں، اس حادثے میں زخمی ہونے والے 13 افراد کا علاج جاری ہے۔ڈاکٹر رجنیش پٹیل نے مزید بتایا کہ اب تک 31 لاشوں کا ڈی این اے ملایا جاچکا ہے ۔ 14 لاشیں ان کے لواحقین کو سونپ دی گئی ہیں، باقی لاشوں کے لواحقین کے اسپتال آنے اور اپنے پیاروں کی باقیات وصول کرنے کا انتظار کیا جا رہا ہے۔
بیٹی سے ملنے جارہی تھیں لندن لیکن۔۔۔
احمد آباد ہوائی حادثے میں وڈودرہ کی انجو شرما کی بھی موت ہوئی ہے۔ انجو شرما کا حادثے والے دن دوپہر 1:05 بجے کا آخری ویڈیو سٹیٹس آیا تھا۔ انجو شرما لندن میں اپنی بڑی بیٹی نِمی شرما اور ان کے خاندان سے ملنے جا رہی تھیں۔ وہ وڈودرہ میں اپنی چھوٹی بیٹی ہنی شرما کے ساتھ رہتی تھیں۔ نِمی نے بتایا کہ ماں کو لندن آنا تھا، لیکن ہمیں وڈودرہ آنا پڑا۔ انہوں نے مزید کہاکہ ایئر انڈیا کی فلائٹ میں حفاظتی انتظامات بہت خراب ہیں۔ مجھے بھی دو بار ایئر انڈیا کی فلائٹ میں خراب تجربہ ہوا ہے۔ میں اپنی زندگی میں کبھی ایئر انڈیا کی فلائٹ میں نہیں بیٹھوں گی۔ میں کسی کو بھی اس کی سفارش نہیں کروں گی۔
ان نمبروں پر کال کرکے لی جاسکتی ہے جانکاری
اس سے پہلے اسپتال کے سپرنٹنڈنٹ ڈاکٹر راکیش جوشی نے بتایا کہ مہلوکین کی لاشیں رشتہ داروں کو حوالے کرنے کا عمل جاری ہے اور ریاستی حکومت کی جانب سے متاثرہ خاندانوں کو ہر ممکن امداد فراہم کی جا رہی ہے۔ راکیش جوشی نے بتایا کہ حادثے کی اطلاع ملتے ہی اسپتال میں 250 سے زائد ڈاکٹروں، نرسوں، پیرا میڈیکل اسٹاف اور رضاکاروں کی ٹیم نے فوری طور پر ریلیف اور علاج کا انتظام سنبھالا، جس کی بدولت کئی زندگیاں بچائی جا سکیں۔طیارہ حادثے کے بعد شہر کے سیول اسپتال میں متاثرہ مسافروں اور ان کے رشتہ داروں کی مدد کے لیے وسیع انتظامات کیے گئے ہیں۔ اسپتال انتظامیہ نے امداد کے لیے 10 مخصوص نمبر جاری کیے ہیں:
9429915911، 9429916096، 9429916118، 9429916378، 9429916608، 9429916622، 9429916682، 9429916758، 9429916771 اور 9429916875۔
رشتہ داروں کو اسپتال کے ڈی 2 بلاک میں واقع کنٹرول روم سے ذاتی طور پر رابطہ کرنا ہوگا۔ کسی مسئلے کی صورت میں اسی موبائل نمبر سے کال کی جا سکتی ہے جس سے پہلے رابطہ کیا گیا ہو۔
