کرناٹک کے 117 اقلیتی اسکولوں کو سرکاری اسکولوں میں اپ گریڈ کیا جائے گا

بنگلورو، 6 مارچ (یو این آئی)کرناٹک حکومت نے 2026-27 کے ریاستی بجٹ میں اقلیتی برادریوں کی فلاح اور تعلیم سے متعلق کئی اقدامات کا اعلان کیا ہے جن میں تعلیمی ڈھانچے، ہنر مندی کی ترقی اور سماجی بااختیاری پر خاص زور دیا گیا ہے۔تجاویز کے تحت 117 مولانا آزاد ماڈل اسکولوں اور اردو اسکولوں کو تقریباً 600 کروڑ روپے کی لاگت سے کرناٹک پبلک اسکولوں میں اپ گریڈ کیا جائے گا۔ اس کے علاوہ مزید 100 اقلیتی اسکولوں کو بھی 400 کروڑ روپے کی لاگت سے بہتر بنایا جائے گا تاکہ معیاری تعلیم تک رسائی میں اضافہ ہو سکے۔حکومت نے سی بی ایس ای نصاب کے تحت 10 سینٹ شیشونالا شریف رہائشی اسکول قائم کرنے کا بھی اعلان کیا ہے جبکہ آئندہ سال مزید 25 ایسے اسکول کھولنے کا منصوبہ ہے۔اعلیٰ تعلیم کو فروغ دینے کے لیے معاشی طور پر کمزور اقلیتی خاندانوں کے 5,000 ہونہار طلبہ کو 50 ہزار روپے مالیت کے لیپ ٹاپ فراہم کیے جائیں گے۔سماجی فلاح کے اقدامات کے تحت جین، بدھ اور سکھ برادریوں کی ترقی کے لیے 100 کروڑ روپے مختص کیے گئے ہیں۔ اس کے علاوہ بدھ دھمّاچاریوں کو ایک نئی امدادی اسکیم کے تحت ہر ماہ 6,000 روپے اعزازیہ دیا جائے گا۔بجٹ میں ثقافتی فروغ پر بھی توجہ دی گئی ہے جس کے تحت ڈاکٹر بی آر امبیڈکر اور دیگر سماجی اصلاح کار کی تصانیف کو اردو میں ترجمہ کیا جائے گا تاکہ اردو بولنے والے قارئین تک انہیں آسانی سے پہنچایا جا سکے۔