تبت میں 1.7 شدت کا زلزلہ

126 افراد ہلاک، 130 سے زائد زخمی

نیپال اور ہندوستان کے کچھ حصوں میں بھی زلزلے کے جھٹکے محسوس کیے گئے

تبت، 7 جنوری:۔ (ایجنسی)  منگل کے روز تبت میں ماؤنٹ ایورسٹ کے قریب ایک طاقتور زلزلہ آیا جس کے نتیجے میں کم از کم 126 افراد ہلاک اور 130 سے زائد زخمی ہوگئے۔ یہ زلزلہ مقامی چینی حکام کے مطابق 6.8 شدت کا تھا، جبکہ امریکی جیولوجیکل سروے نے اس کی شدت 7.1 ریکارڈ کی۔ زلزلہ مقامی وقت کے مطابق صبح 6:35 بجے تنگری کاؤنٹی میں آیا، جو ماؤنٹ ایورسٹ سے تقریباً 80 کلومیٹر شمال میں واقع ہے۔ اس کے جھٹکے نیپال، بھوٹان اور بھارت کے بعض علاقوں میں بھی محسوس کیے گئے۔زلزلہ تبت کے لھاسا بلاک میں ہونے والی دراڑ کے باعث آیا، جو ایک ایسا علاقہ ہے جس میں ٹیکٹونک دباؤ بہت زیادہ ہے۔ یہ علاقہ بھارتی اور یوریشین ٹیکٹونک پلیٹوں کے ٹکراؤ کی وجہ سے ایک اہم سیزمک سرگرمی کا مرکز ہے، جو گزشتہ 60 ملین سالوں سے ہمالیہ کی تشکیل میں اہم کردار ادا کر رہا ہے۔تبت میں گزشتہ چند دہائیوں میں کئی زلزلے آ چکے ہیں، جن میں 1950 میں آیا 8.6 شدت کا زلزلہ بھی شامل ہے۔حکام نے زخمیوں کی فوری مدد کے لیے ریسکیو آپریشن شروع کر دیا ہے، جبکہ متاثرہ علاقوں میں امدادی کارروائیاں تیز کر دی گئی ہیں۔ اس تباہی نے علاقے کی سیزمک سرگرمی کی شدت اور انسانی زندگی پر اس کے اثرات کو ایک بار پھر اجاگر کیا ہے۔

ہندوستان نے بھی جھٹکے محسوس کیے
ہندوستان میں دہلی این سی آر کے علاوہ مغربی بنگال اور بہار میں بھی زلزلے کے جھٹکے محسوس کیے گئے۔ 7 جنوری کی تاریخ دو دیگر بڑے زلزلوں کے لیے بھی مشہور ہے۔ اس دن 1994 میں امریکہ اور 1995 میں جاپان کی زمین کانپ گئی۔ 20 سال قبل جاپان میں آنے والے اس زلزلے میں 6000 سے زائد افراد اپنی جانوں سے ہاتھ دھو بیٹھے تھے۔