آدتیہ ساہو اور بابولال مرانڈی کا امبیڈکر کے نظریات پر عمل کا عہد
جدید بھارت نیوز سروس
رانچی ، 14؍ اپریل: بھارت کے آئین ساز، سماجی انصاف اور مساوات کے علمبردار بھارت رتن ڈاکٹر بھیم راؤ امبیڈکر کے یوم پیدائش کے موقع پر بی جے پی کے ریاستی دفتر میں ریاستی صدر آدتیہ ساہو اور لیڈر آف اپوزیشن بابولال مرانڈی سمیت دیگر رہنماؤں نے ان کی تصویر پر گلہائے عقیدت پیش کیے۔اس موقع پر ریاستی صدر آدتیہ ساہو نے کہا کہ بابا صاحب نے نہ صرف بھارتی آئین کی تشکیل میں اہم کردار ادا کیا بلکہ آزاد بھارت کو جمہوری اور انصاف پسند بنایا۔ انہوں نے آئین کے صفحات پر ملک کی ترقی اور کروڑوں لوگوں کی فلاح و بہبود کی داستان لکھی۔مودی حکومت آج ان کے اصولوں پر عمل کرتے ہوئے ملک کے ہر طبقے کی ترقی کے لیے پرعزم ہے۔ بابا صاحب کی جدوجہد، ان کے نظریات اور ان کا دکھایا ہوا راستہ ہمیشہ اہمیت کا حامل رہے گا۔وہیں بابولال مرانڈی نے کہا کہ بھارت کے آئین ساز ڈاکٹر بھیم راؤ امبیڈکر نے معاشرے کے پسماندہ اور مظلوم طبقات کو حقوق دلانے کے لیے تاحیات جدوجہد کی اور ایک منصفانہ نظام کی بنیاد رکھی۔ بابا صاحب کے نظریات کو اپنا کر ہم ایک ایسے بھارت کی تعمیر کا عہد کریں جہاں مساوات، انصاف اور بھائی چارے کا جذبہ مضبوط ہو۔بابا صاحب کے مساوات، انصاف اور انسانیت کے اصول ہم وطنوں کے لیے ہمیشہ مشعلِ راہ رہیں گے۔ آئین کے ذریعے بابا صاحب نے ملک کے غریب اور پسماندہ معاشرے کو طاقت دینے کا کام کیا۔اس دوران ریاستی نائب صدر راکیش پرساد، سابق ریاستی صدر یدوناتھ پانڈے، سابق ایم ایل اے کشن داس، سورج چورسیا، ریاستی ترجمان پرتل شاہ دیو، کمال خان، پریم متل، دین دیال برنوال، سندیپ ورما، شوبھا یادو، رمیش سنگھ، سنیل ساہو، ارون جھا، اوشا پانڈے، راج شری جینتی، چندر پرکاش سمیت دیگر لوگ موجود تھے۔
ڈورنڈا میں امبیڈکر چوک پر بھی خراج عقیدت پیش کیا گیا
علاوہ ازیں، ڈورنڈا امبیڈکر چوک پر واقع بابا صاحب کے مجسمے پر بھی پھول مالاچڑھائی گئی اور انہیں خراج عقیدت پیش کیا گیا۔ اس موقع پر ریاستی صدر آدتیہ ساہو، لیڈر آف اپوزیشن بابولال مرانڈی، مرکزی وزیر سنجے سیٹھ، رانچی کے ایم ایل اے سی پی سنگھ، ہٹیا کے ایم ایل اے نوین جیسوال، رانچی مہانگر صدر ورون ساہو سمیت دیگر اہم شخصیات موجود تھیں۔
