گھاٹ شلاضمنی انتخاب کے حوالے سے چیف الیکٹورل افسر کی سیاسی جماعتوں سے اپیل
جدید بھارت نیوز سروس
رانچی، 11 اکتوبر:۔ چیف الیکٹورل آفیسر روی کمار نے کہا ہے کہ 45-گھاٹ شلااسمبلی حلقے کے ضمنی انتخاب کے اعلان کے ساتھ ہی انتخابی ضابطۂ اخلاق (ماڈل کوڈ آف کنڈکٹ) نافذ العمل ہو گیا ہے۔ انہوں نے تمام تسلیم شدہ سیاسی جماعتوں سے اپیل کی ہے کہ وہ اپنے پارٹی کارکنان کو منصفانہ اور پرامن انتخابی عمل کو یقینی بنانے کے لیے مکمل طور پر ضابطۂ اخلاق پر عمل درآمد کا پابند بنائیں۔
بی ایل ایز کے تقرر پر زور
روی کمار نے یہ بات رانچی کے نرواچن سدن میں گھاٹ شلاضمنی انتخاب کے حوالے سے سیاسی جماعتوں کے نمائندوں کے ساتھ ایک میٹنگ کے دوران کہی۔ انہوں نے جماعتوں پر زور دیا کہ وہ اپنے بوتھ لیول ایجنٹس (BLAs) کا بروقت تقرر کریں اور ان کی تفصیلات فوری طور پر متعلقہ حکام کو فراہم کریں، تاکہ ضمنی انتخاب کے دوران ہم آہنگی اور شفافیت کو برقرار رکھا جا سکے۔
سی سی ٹی وی کیمروں کے ذریعے ویب کاسٹنگ
چیف الیکٹورل آفیسر نے بتایا کہ انتخابی عمل کی نگرانی کے لیے تمام پولنگ اسٹیشنز پر سی سی ٹی وی کیمروں کے ذریعے ویب کاسٹنگ کی جائے گی۔ اس کے علاوہ حلقے کی سرحدوں پر واقع چیک پوسٹوں پر بھی سی سی ٹی وی کے ذریعہ نگرانی کی جائے گی۔ ان کے مطابق، یہ اقدامات شفاف، غیر جانبدار اور منصفانہ انتخاب کو یقینی بنانے کی طرف ایک اہم قدم ہیں۔
کیا کرنا ہے اور کیا نہیں
میٹنگ کے دوران کمیشن کے “کیا کرنا ہے اور کیا نہیں”، پریس نوٹ کی کاپی، پولنگ اسٹیشنز پر قابل قبول شناختی دستاویزات کی فہرست، اور انتخاب سے متعلق رہنما ہدایات فراہم کی گئیں۔ روی کمار نے کہا کہ سیاسی جماعتوں کی طرف سے دی گئی تجاویز پر کمیشن کے ضوابط کے مطابق ضروری کارروائی کی جائے گی۔
انہوں نے مزید کہا کہ اگر کوئی سیاسی جماعت کسی ایسے امیدوار کو نامزد کرتی ہے جس کا مجرمانہ پس منظر ہو، تو اسے کمیشن کے قواعد کے مطابق فارم 1، 2 اور 7 میں مطلوبہ معلومات کی اشاعت کو یقینی بنانا ہوگا۔ میٹنگ میں تسلیم شدہ سیاسی جماعتوں کے نمائندے، نوڈل آفیسر دیو داس دتہ، سب الیکٹورل آفیسر سنیل کمار، اور چیف الیکٹورل آفیسر کے دفتر کے دیگر افسران بھی موجود تھے۔
