جدید بھارت نیوز سروس
ہزاریباغ،31؍دسمبر: جھارکھنڈ کی انتہائی حساس اور ہائی سیکیورٹی سمجھی جانے والی لوک نائک جے پرکاش نارائن سینٹرل جیل سے تین قیدی سیکیورٹی حصار توڑ کر فرار ہو گئے ہیں۔ یہ تینوں قیدی دھنباد کے رہنے والے ہیں۔ اس واقعے کی تصدیق جیل سپرنٹنڈنٹ چندر شیکھر سمن نے کی ہے۔ تاہم، یہ قیدی کون ہیں، کس کیس میں سزا کاٹ رہے تھے یا زیر سماعت تھے، اس بارے میں جیل انتظامیہ نے تاحال کوئی معلومات فراہم نہیں کی ہیں۔
سیکیورٹی انتظامات پر سوالات اٹھنے لگے
اس واقعے نے پورے انتظامی ڈھانچے کو سکتے میں ڈال دیا ہے۔ یہ جیل اپنی ہائی سیکیورٹی کے لیے جانی جاتی ہے، جہاں خطرناک قیدیوں اور عسکریت پسندوں کو رکھا جاتا ہے۔ اس کے ساتھ ہی کئی ہائی پروفائل زیر سماعت قیدی بھی یہاں بند ہیں۔ ایسے میں تین قیدیوں کے لاپتہ ہونے کے بعد سیکیورٹی انتظامات پر سوالات اٹھنا شروع ہو گئے ہیں۔حالیہ دنوں میں ہزاری باغ جیل کی سیکیورٹی کو مزید سخت کیا گیا تھا۔ سیکیورٹی میں غفلت برتنے پر جیل آئی جی نے گزشتہ دنوں کارروائی کرتے ہوئے 12 سیکیورٹی اہلکاروں کو فوری طور پر معطل کر دیا تھا۔ اس کے بعد سیکیورٹی مزید بہتر کرنے کا دعویٰ کیا گیا تھا، لیکن اس واقعے نے ایک بار پھر جیل انتظامیہ کے دعووں پر سوالیہ نشان لگا دیا ہے۔
قیدی جیل سے کیسے فرار ہوئے؟
فرار ہونے والے تینوں قیدی چار نمبر گومٹی سے رسی کے سہارے بھاگے ہیں۔ جیل کے پچھلے حصے میں ایک رسی دیکھی گئی ہے، جو ٹینٹ ہاؤس میں استعمال ہونے والے کپڑوں کے ٹکڑوں سے بنائی گئی ہے۔ جائے وقوعہ کو دیکھ کر یہ اندازہ لگایا جا رہا ہے کہ رسی پہلے اندر سے باہر پھینکی گئی ہے، جو ہائی سیکیورٹی جیل کے گرد لگی بجلی کی تاروں میں کسی چیز کے ذریعے پھنس گئی، جہاں سے یہ تینوں قیدی فرار ہوئے۔
موصولہ اطلاعات کے مطابق، یہ واقعہ رات ایک سے دو بجے کے درمیان پیش آیا۔ تینوں قیدی بیت الخلا جانے کے بہانے باہر نکلے اور وہیں کی کھڑکی سے فرار ہوئے۔ جیل کے بیرونی حصے میں لگی خاردار تاروں کی باڑ بھی ٹوٹی ہوئی ملی، اگرچہ لوگوں کا کہنا ہے کہ یہ پہلے سے ٹوٹی ہوئی تھی۔ جیل کی دیواروں پر بجلی کی تاریں لگی ہوئی ہیں جن میں 24 گھنٹے کرنٹ رہتا ہے، اس کے باوجود قیدی سیکیورٹی حصار توڑ کر فرار ہونے میں کامیاب ہو گئے۔
ہزاری باغ سنٹرل جیل سے تین قیدی فرار، انتظامیہ میں کھلبلی
