جدید بھارت نیوز سروس
رانچی، 12 ستمبر:۔ رانچی میں صبح سویرے ایک افسوسناک واقعہ پیش آیا ہے۔ کھیلگاؤں میں آج صبح تقریباً 6:45 بجے ایک اسکول بس نے اسکوٹی کو ٹکر مار دی۔ حادثے میں اسکوٹی پر سوار لڑکی کی موقع پر ہی موت ہو گئی۔ عینی شاہدین کے مطابق اسکول بس تیز رفتاری سے جا رہی تھی کہ کھیل گاوں کے قریب اچانک اسکوٹی سے ٹکرا گئی۔ لوگوں نے بتایا کہ ٹکر کے بعد لڑکی اسکوٹی سمیت سڑک پر گر گئی اور بس اسے کچل کر چلی گئی۔ مقامی لوگوں نے بتایا کہ صبح لڑکی اسکوٹی پر اپنے چھوٹے بھائی کے ساتھ پوجا کرنے مندر جا رہی تھی، اسی دوران یہ حادثہ ہوا۔ تصادم کے بعد پیچھے بیٹھا لڑکی کا چھوٹا بھائی سڑک کے دوسری طرف گر گیا جس سے اس کی جان بچ گئی۔ حادثے میں بس کا پہیہ ہیلمٹ پہنے طالبہ کے سر کے اوپر سے چلا گیا جس کے باعث لڑکی موقع پر ہی جاں بحق ہو گئی۔ لڑکی کے والد کا نام شیام ہے اور وہ لال پور کی ڈسٹلری مارکیٹ میں مچھلی فروخت کرتا ہے۔ حادثے کے بعد مشتعل مقامی لوگوں نے سڑک بلاک کردی اور ہنگامہ آرائی شروع کردی۔ کھیلگاؤں تھانہ انچارج نے لوگوں کو سمجھانے کے بعد سڑک سے ہٹا دیا ہے۔ اس دوران کئی اسکول بسیں جام میں پھنسی رہیں۔
اسکول بس نے طالبہ کو کچل دیا، موقع پر ہی موت
