الیکشن کمیشن نے بی جے پی اور جے ایم ایم سے پریس کانفرنس پر جواب طلب کیا، کہا- یہ کام ضابطہ اخلاق کے خلاف ہے

جدید بھارت نیوز سروس
رانچی، 20 نومبر:۔ الیکشن کمیشن نے بی جے پی اور جے ایم ایم سے ریاست میں دوسرے مرحلے کی ووٹنگ کے لیے اعلان کردہ ’سائیلنٹ پیریڈ‘ کے دوران پریس کانفرنس کرنے پر وضاحت طلب کی ہے۔ دونوں جماعتوں نے منگل کو پریس کانفرنس کی تھی۔ جھارکھنڈ کے چیف الیکٹورل افسر کے روی کمار نے رانچی کے ڈی سی اور ایس ایس پی کو خط لکھا ہے اور بی جے پی اور جے ایم ایم کی طرف سے منعقد کی گئی پریس کانفرنس سے متعلق ایک ویڈیو کلپ بھیجی ہے۔ کے روی کمار نے کہا کہ ریاست میں دوسرے مرحلے کی ووٹنگ 20 نومبر کو ہونی ہے۔ انتخابات کے لیے لاگو ’سائیلنٹ پیریڈ‘ کے دوران بی جے پی اور جے ایم ایم کی طرف سے پریس کانفرنس کرنا ماڈل ضابطہ اخلاق کے خلاف ہے۔ دونوں پریس کانفرنسیں کن حالات میں منعقد کی گئیں اور کن عہدیداروں نے اس کی اجازت دی؟ ڈی سی اور ایس پی سے کہا گیا ہے کہ وہ تحقیقات کے بعد ذمہ دار اہلکاروں کے ساتھ معاملے کی وضاحت کریں، قواعد کے مطابق کارروائی کریں اور بدھ کی صبح 11 بجے تک کمیشن کو رپورٹ کریں۔
کیا ہے سائیلنٹ پیریڈ ؟
سائیلنٹ پیریڈ وہ وقت ہے جب ووٹنگ ختم ہونے سے 48 گھنٹے پہلے تک ہر قسم کی انتخابی مہم روک دی جاتی ہے۔ پارٹیاں کسی بھی طرح سیاسی بیانات نہیں دے سکتیں، اس کے ٹیلی کاسٹ پر بھی پابندی ہے۔ سائیلنٹ پیریڈ کے دوران ووٹروں کو اپیل کرنے والے پیغامات پر بھی پابندی رہتی ہے۔