جے ایم ایم نے مودی حکومت پر لگائے سنگین الزامات
روپے کی گرتی قدر، کارپوریٹ قرضوں کی معافی اور NEET تنازع پر مرکز کو گھیرا
جدید بھارت نیوز سروس
رانچی، 12 مئی:۔ جھارکھنڈ مکتی مورچہ (JMM) کے مرکزی جنرل سکریٹری اور ترجمان سپریو بھٹاچاریہ نے ہرمو میں واقع پارٹی ہیڈکوارٹر میں ایک اہم پریس کانفرنس کے دوران مودی حکومت کی معاشی پالیسیوں پر کڑی تنقید کی۔ انہوں نے الزام لگایا کہ گزشتہ 12 برسوں کے بلند بانگ دعوؤں کی حقیقت اب عوام کے سامنے آ رہی ہے اور ملک کی معاشی حالت روز بروز ابتر ہوتی جا رہی ہے۔ انہوں نے کہا کہ ڈالر کے مقابلے روپے کی قیمت 85 کے پار پہنچنا معیشت کی کمزوری کا منہ بولتا ثبوت ہے، جبکہ حکومت عوامی شعبے کی کمپنیوں کو کمزور کر کے بڑے کارپوریٹ گھرانوں کے قرض معاف کرنے میں مصروف ہے۔
وزیراعظم کے لیے 9 نکاتی مشورے اور مطالبات
سپریو بھٹاچاریہ نے وزیراعظم کے اس بیان کا حوالہ دیا جس میں عوام کو سونا، پیٹرول، ڈیزل اور خوردنی تیل کی کھپت کم کرنے کا مشورہ دیا گیا تھا۔ اس پر جوابی وار کرتے ہوئے جے ایم ایم ترجمان نے وزیراعظم کے سامنے 9 مطالبات رکھے، جن میں وزیراعظم کے غیر ملکی دوروں پر ایک سال کی پابندی، بی جے پی کی ریلیوں اور روڈ شوز پر روک، وزراء اور وزرائے اعلیٰ کے قافلوں کو محدود کرنا اور انہیں ‘ورک فرام ہوم ‘ ماڈل پر منتقل کرنے جیسے مشورے شامل ہیں۔ انہوں نے یہ بھی مطالبہ کیا کہ قدرتی وسائل کی نجی کمپنیوں کو الاٹمنٹ روکی جائے اور مائیکرو، سمال اینڈ میڈیم انٹرپرائزز (MSME) کو فروغ دیا جائے۔
معاشی ایمرجنسی اور لاک ڈاؤن کا خدشہ
جے ایم ایم لیڈر نے اندیشہ ظاہر کیا کہ اگر موجودہ صورتحال برقرار رہی تو ملک میں معاشی ایمرجنسی یا لاک ڈاؤن جیسی صورتحال پیدا ہو سکتی ہے۔ انہوں نے کہا کہ عالمی اقتصادی درجہ بندی میں بھارت کی پوزیشن متاثر ہو رہی ہے، جس کا براہِ راست اثر غریب عوام پر پڑ رہا ہے۔ ان کے مطابق غلط پالیسیوں کے نتیجے میں ملک میں بھوک مری اور بحران کی کیفیت مزید سنگین ہو سکتی ہے۔ انہوں نے کسانوں کے لیے کم از کم امدادی قیمت (MSP) کے نفاذ اور خواتین کے سونے کے حوالے سے پالیسیوں میں تبدیلی نہ کرنے کا بھی مطالبہ کیا۔
نیٹ (NEET) تنازع اور بی جے پی پر طنز
پریس کانفرنس کے دوران نیٹ (NEET) امتحان میں ہونے والی بے ضابطگیوں پر تبصرہ کرتے ہوئے سپریو بھٹاچاریہ نے اسے ‘کوچنگ سنڈیکیٹ ‘ کی ملی بھگت قرار دیا۔ انہوں نے سی بی آئی (CBI) انکوائری کو محض ایک خانہ پوری قرار دیتے ہوئے کہا کہ مرکز طلبا کے مستقبل کے ساتھ کھلواڑ کر رہا ہے۔ بی جے پی کی جانب سے پانی اور بجلی کے معاملے پر کیے جانے والے احتجاج کو مضحکہ خیز قرار دیتے ہوئے انہوں نے کہا کہ بڑھتی ہوئی مہنگائی اور غلط معاشی پالیسیوں نے عوام پر پہلے ہی ناقابل برداشت بوجھ ڈال رکھا ہے۔
