اسکیموں میں سستی پر بینکوں کو سخت وارننگ
جدید بھارت نیوز سروس
چترا،9؍جنوری: ڈپٹی کمشنر کریتی شری کی ہدایت پر، ڈپٹی ڈیولپمنٹ کمشنر (DDC) امریندر کمار سنہا کی صدارت میں چترا کلکٹریٹ کے میٹنگ ہال میں ڈسٹرکٹ لیول مشاورتی کمیٹی (DLCC) اور ڈسٹرکٹ لیول ریویو کمیٹی (DLRC) کا مشترکہ اجلاس منعقد ہوا۔ اجلاس میں مالی سال 26-2025 کی دوسری سہ ماہی کی بینکنگ پیش رفت کا تفصیلی جائزہ لیا گیا۔ اس کے ساتھ ہی یکم جولائی سے 31 اکتوبر 2025 تک چلائی گئی مالی شمولیت مہم (Financial Inclusion Saturation Campaign) پر خصوصی بحث کی گئی۔ مہم کے تحت جن دھن کھاتوں کی دوبارہ KYC، پردھان منتری جیون جیوتی بیما یوجنا (PMJJBY)، پردھان منتری سورکشا بیما یوجنا (PMSBY)، اٹل پنشن یوجنا (APY) اور سائبر سیکیورٹی سے متعلق آگاہی جیسے نکات کو اولین ترجیح دینے پر زور دیا گیا۔اجلاس کے دوران ڈی ڈی سی نے کہا کہ مالی شمولیت ریاستی اور مرکزی حکومت کی اولین ترجیح ہے، اس لیے تمام بینک شاخیں اور بی سی ایجنٹ اپنی سرگرمیوں میں اضافہ کریں تاکہ اسکیموں کا اصل فائدہ مستحق افراد تک پہنچ سکے۔ کسان کریڈٹ کارڈ (KCC) اسکیم میں بعض بینکوں کی صفر کارکردگی پر ڈپٹی ڈیولپمنٹ کمشنر نے سخت ناراضگی کا اظہار کیا اور ہدف کو پورا کرنے کے لیے موثر ایکشن پلان بنانے کی ہدایت دی۔ انہوں نے کہا کہ KCC کسانوں کی معاشی ریڑھ کی ہڈی کو مضبوط کرنے کی ایک اہم اسکیم ہے، لہذا تمام بینک اس سمت میں سنجیدگی سے کام کریں۔سالانہ کریڈٹ پلان (ACP) کے جائزے کے دوران ترجیحی شعبوں میں قرضوں کی تقسیم، پیش رفت اور رکاوٹوں پر بھی تفصیلی تبادلہ خیال کیا گیا۔ ضلع کے کریڈٹ ڈپازٹ ریشو (CD Ratio) کا مسئلہ بھی اجلاس میں نمایاں طور پر اٹھایا گیا، جو فی الحال 14.32% ہے، جبکہ ہدف 40% مقرر ہے۔ اس پر ڈی ڈی سی نے بینک حکام کو ہدایت دی کہ دیہی علاقوں میں قرضوں کی دستیابی بڑھانے، انٹرپرینیورشپ کی حوصلہ افزائی اور ترجیحی شعبوں میں سرمایہ کاری بڑھانے کے لیے خصوصی آگاہی مہم چلائی جائے۔ اجلاس میں ضلع پریشد کی صدر ممتا کماری، آر بی آئی کے نمائندے روشن کمار گھریا، نابارڈ کے ڈی ڈی ایم مرتیونجے بخشی، لیڈ بینک مینیجر احسن احمد، جے ایس ایل پی ایس کے ڈی پی ایم گورو جیسوال اور مختلف بینکوں کے مینیجرز موجود تھے۔
