تمام اضلاع کو ایبسنٹ، شفٹڈ، ڈیتھ اور ڈپلیکیٹ ووٹروں کی فہرست ڈیجیٹلائز کرنے کی ہدایت
جدید بھارت نیوز سروس
رانچی، 13 مارچ:۔ ریاست کے چیف الیکشن آفیسر کے۔ روی کمار نے کہا ہے کہ ووٹر لسٹ کے جامع جائزے کے عمل میں کسی بھی قسم کی غلطی کی کوئی گنجائش نہیں ہے۔ انہوں نے افسران کو ہدایت دی کہ بھارت الیکشن کمیشن کی جانب سے مقرر کردہ قوانین اور ضابطوں کے مطابق ہی تمام کارروائیاں اور فیصلے کیے جائیں۔وہ جمعہ کے روز نرواچن سدن سے تمام اضلاع کے ضلع الیکشن افسران کے ساتھ ایک جائزہ میٹنگ کر رہے تھے۔ اس موقع پر انہوں نے کہا کہ ووٹر لسٹ کے ڈرافٹ پبلیکیشن کے وقت ایبسنٹ، شفٹڈ، ڈیتھ اور ڈپلیکیٹ ووٹروں کی فہرست الگ سے شائع کی جائے گی، اس لیے اس فہرست کو مقررہ وقت میں ڈیجیٹلائز کرنا یقینی بنایا جائے۔چیف الیکشن آفیسر نے بتایا کہ اے ایس ڈی ڈی فہرست کی تصدیق متعلقہ پولنگ اسٹیشن کے تسلیم شدہ سیاسی جماعتوں کے بوتھ لیول ایجنٹس سے کرانا لازمی ہوگا۔ انہوں نے تمام اضلاع کو ہدایت دی کہ ووٹر لسٹ کے جامع جائزے سے قبل اضلاع کی سطح پر تسلیم شدہ سیاسی جماعتوں کے ساتھ تیاریوں اور باہمی تال میل کے حوالے سے میٹنگ ضرور کی جائے۔کے۔ روی کمار نے کہا کہ یہ یقینی بنایا جائے کہ کوئی بھی اہل شہری ووٹر لسٹ میں شامل ہونے سے محروم نہ رہ جائے۔ انہوں نے بوتھ لیول افسران (بی ایل او) کو ہدایت دی کہ گھر گھر سروے کے دوران ہر گھر کے سربراہ اور وہاں رہنے والے تمام افراد کی ایک فہرست بھی تیار کریں تاکہ ووٹر لسٹ کے جامع جائزے کے عمل میں سہولت ہو۔انہوں نے مزید کہا کہ جن مکانات کا کوئی نمبر نہیں ہے انہیں نوٹیشنل نمبر دے کر نشان زد کیا جائے، تاکہ ایک ہی مکان میں رہنے والے ووٹروں کا پولنگ اسٹیشن ایک ہی جگہ پر مقرر رہے۔چیف الیکشن آفیسر نے بی ایل او اور بی ایل او سپروائزرز کی بروقت تربیت کرانے کی بھی ہدایت دی۔ تربیت کے دوران ECINET کے ذریعے بی ایل او سے رابطہ کرنے کے ’بک اے کال‘ (Book a Call) فیچر کے بارے میں مکمل معلومات دینے اور ووٹروں کی جانب سے کیے گئے سوالات اور شکایات کا فوری ازالہ کرنے پر زور دیا۔میٹنگ میں جوائنٹ چیف الیکشن آفیسر سبودھ کمار، ٹریننگ نوڈل افسر دیو داس دتہ، ڈپٹی الیکشن آفیسر دھیرج ٹھاکر اور اسسٹنٹ الیکشن آفیسر سنیل کمار سمیت الیکشن سے متعلق دیگر افسران موجود تھے۔
