جدید بھارت نیوز سروس
رانچی، 4 جولائی:۔ دارالحکومت رانچی میں ٹریفک جام سے نجات دلانے کے مقصد سے بنائے گئے تین بڑے فلائی اوور اب اپنی افادیت ثابت کر رہے ہیں۔ ٹریفک کی روانی میں ان فلائی اوورز کا کردار اہم ثابت ہو رہا ہے۔ لیکن اب ان کے نیچے ناجائز تجاوزات کا مسئلہ تیزی سے بڑھنے لگا ہے جس کی وجہ سے نیچے کی سڑکوں پر پھر سے جام کی صورتحال پیدا ہونا شروع ہوگئی ہے۔ اس سلسلے میں رانچی میونسپل کارپوریشن کی انفورسمنٹ ٹیم نے جمعہ کو ایک بڑی مہم شروع کی۔ مہم کے تحت کشوری یاد چوک سے راتو روڈ اور پسکا موڑ تک فلائی اوور کے نیچے اور سڑک کے کنارے قائم غیر قانونی گاڑیاں، دکانیں اور تجاوزات ہٹا دی گئیں۔ میونسپل کارپوریشن کی اس کارروائی کے دوران کئی مقامات پر دکانداروں اور کارپوریشن کے ملازمین کے درمیان ہلکی ہلکی ہاتھا پائی بھی دیکھنے میں آئی تاہم بالآخر تجاوزات ہٹا دی گئیں۔ کارپوریشن کی جانب سے واضح ہدایات دی گئیں کہ فلائی اوور کے نیچے دوبارہ دکانیں قائم کرنے والوں کے خلاف سخت کارروائی کی جائے گی۔ اس سلسلے میں رانچی میونسپل کارپوریشن کے تعلقات عامہ کے افسر گوتم پرساد ساہو نے کہا کہ فلائی اوور بنانے کا مقصد ٹریفک کو راحت دینا تھا لیکن اگر اس کے نیچے تجاوزات ہوں گی تو پورا مقصد ہی ناکام ہو جائے گا۔ انہوں نے کہا کہ اگر بروقت سخت اقدامات نہ اٹھائے گئے تو فلائی اوور کے نیچے سڑکوں پر ٹریفک جام کا مسئلہ دوبارہ شروع ہو جائے گا۔
راتو روڈ فلائی اوور کے نیچے سے تجاوزات ہٹائی گئی
