وزیر ٹرانسپورٹ دیپک بیروا کی موجودگی میں ریاستی سطحی سیمینار و تربیتی پروگرام منعقد
جدید بھارت نیوز سروس
رانچی، 31 جنوری :۔ قومی سڑک تحفظ ماہ 2026 کے کامیاب اختتام کے موقع پر رانچی میں ایک ریاستی سطحی سیمینار سَہ تربیتی پروگرام کا انعقاد کیا گیا، جس میں جھارکھنڈ میں سڑک تحفظ سے متعلق اقدامات اور کامیابیوں کا جائزہ لیا گیا۔ اس پروگرام کا افتتاح جھارکھنڈ حکومت کے معزز وزیر برائے ٹرانسپورٹ شری دیپک بیروا نے چراغ روشن کر کے کیا۔
رانچی کو ریاست میں پہلا مقام
قومی سڑک تحفظ کے میدان میں شاندار کارکردگی کے اعتراف میں رانچی ضلع کو ریاست بھر میں پہلا مقام حاصل ہوا، جبکہ رام گڑھ ضلع کو دوسرے مقام سے نوازا گیا۔ یہ اعزاز سڑک حادثات میں اموات کی شرح کو کم کرنے، بیداری مہمات، نگرانی اور تکنیکی اقدامات کو مؤثر طریقے سے نافذ کرنے کے لیے دیا گیا۔
رام گڑھ کو اعزاز
ریاستی سطحی سیمینار کے دوران رام گڑھ ضلع کو سڑک تحفظ میں نمایاں خدمات کے لیے دوسرا انعام پیش کیا گیا۔ یہ ایوارڈ جھارکھنڈ کے وزیر ٹرانسپورٹ دیپک بیروا، ٹرانسپورٹ کمشنر سنجیو کمار بسرا اور جوائنٹ ٹرانسپورٹ کمشنر (روڈ سیفٹی) پردیپ کمار کی موجودگی میں دیا گیا۔ رام گڑھ ضلع کی جانب سے تکنیکی معاون (روڈ سیفٹی) وکاس کمار کے ہمراہ موٹر وہیکل انسپکٹر منو مرنل اور وپل اوراون نے ایوارڈ وصول کیا۔
قومی سڑک تحفظ ماہ 2026
قابل ذکر ہے کہ وزارتِ سڑک ٹرانسپورٹ و شاہراہ، حکومت ہند کی ہدایات کے تحت جھارکھنڈ میں یکم جنوری سے 31 جنوری 2026 تک قومی سڑک تحفظ ماہ منایا گیا۔ اس دوران عوامی بیداری، تربیت اور سڑک تحفظ سے متعلق مختلف سرگرمیوں کا انعقاد کیا گیا، جن میں روڈ سیفٹی کوئز جیسے پروگرام بھی شامل تھے تاکہ عوام میں شعور بیدار کیا جا سکے۔
اس ریاستی سطحی پروگرام میں محکمۂ ٹرانسپورٹ کے اعلیٰ افسران، روڈ سیفٹی سے وابستہ عہدیداران اور مختلف اضلاع کے نمائندے موجود تھے۔ سیمینار کا مقصد جھارکھنڈ میں سڑک تحفظ کے اقدامات کو مزید مضبوط بنانا اور مستقبل میں حادثات کی روک تھام کے لیے مؤثر حکمت عملی تیار کرنا تھا۔
