جدید بھارت نیوز سروس
گریڈیہہ ،17؍فروری: گریڈیہہ پولیس نے سائبر مجرموں کے خلاف اپنی مہم میں ایک اور بڑی کامیابی حاصل کی ہے۔ ‘پرتِبیمب پورٹل‘ سے موصولہ خفیہ اطلاع پر کارروائی کرتے ہوئے پولیس نے تاراٹانڑ تھانہ علاقہ کے تحت بڑکی ٹانڑ-جبرداہا سڑک کے کنارے واقع ایک کاجو باغ سے تین خطرناک سائبر مجرموں کو رنگے ہاتھوں گرفتار کر لیا۔
کارروائی کی تفصیلات
پولیس سپرنٹنڈنٹ گریڈیہہ ، ڈاکٹر بمل کمار (آئی پی ایس) کو اطلاع ملی تھی کہ کچھ نوجوان باغ میں بیٹھ کر موبائل کے ذریعے لوگوں سے مالی دھوکہ دہی کر رہے ہیں۔ ایس پی کی ہدایت پر سائبر ڈی ایس پی عابد خاں کی قیادت میں ایک خصوصی ٹیم تشکیل دی گئی، جس نے جائے وقوعہ پر اچانک چھاپہ مار کر تین ملزمان کو دھر لیا۔ پولیس نے اس سلسلے میں سائبر تھانہ کیس نمبر 05/2026 درج کر لیا ہے۔
گرفتار ملزمان کی شناخت
پولیس کے مطابق گرفتار کیے گئے ملزمان میں درج ذیل افراد شامل ہیں:
آشیش منڈل (27 سال) ساکن نگر کیشواری، تھانہ سریا۔ رنجیت کمار منڈل (26 سال) ساکن نگر کیشواری، تھانہ سریا۔ رامیشور منڈل عرف رمیش منڈل (29 سال) ساکن پنچن ٹانڑ ، تھانہ اہلیہ پور شامل ہیں۔
طریقہ واردات اور برآمدگی
ملزمان نے اعتراف کیا کہ وہ کئی بینکوں کی جعلی APK فائلز بھیج کر اور خود کو بینک افسر ظاہر کر کے سادہ لوح عوام کو اپنے جھانسے میں لیتے تھے اور ان کے اکاؤنٹس سے رقم اڑا لیتے تھے۔ پولیس نے ان کے قبضے سے 04 اسمارٹ فون اور 05 سم کارڈز برآمد کیے ہیں۔
تحقیقات میں یہ بات سامنے آئی ہے کہ گرفتار ملزمان بین ریاستی سطح پر سرگرم تھے۔
رمیش منڈل: یہ پہلے بھی جامتاڑا سائبر تھانہ کیس (15/2023) میں جیل جا چکا ہے۔ اس کے موبائل نمبر پر ملک کی مختلف ریاستوں میں کل 26 شکایات درج ہیں۔
رنجیت منڈل: اس کے خلاف بھی 03 آن لائن شکایات پہلے سے موجود پائے گئے ہیں۔
پولیس ٹیم کے ارکان
اس کامیاب کارروائی میں ڈی ایس پی عابد خان کے ہمراہ انسپکٹر رامیشور بھگت، دنیش کمار، چندر ناتھ اوراؤں، اے ایس آئی گجندر کمار اور کانسٹیبل کنور پرتاپ سنگھ و راہول کمار شامل تھے۔
گریڈیہہ کے کاجو باغان میں چھاپہ ؛تین بین ریاستی سائبر مجرم گرفتار
