دیہی روزگار، لیبر اصلاحات اور ’وندے ماترم‘ کے 150 سال پر بامعنی مکالمہ
جدید بھارت نیوز سروس
ہزاری باغ، 9 جنوری (پی آئی بی): حکومت ہند کی وزارت اطلاعات و نشریات کے تحت پریس انفارمیشن بیورو (PIB)، رانچی نے 9 جنوری 2026 کو ہزاری باغ کے ہوٹل کینری ان میں ضلع کے صحافیوں کے ساتھ ایک روزہ “وارتا لاپ” (تبادلہ خیال) پروگرام کا کامیاب انعقاد کیا۔ اس پروگرام کا مقصد مرکزی حکومت کے اہم اقدامات اور قومی اہمیت کے موضوعات پر میڈیا کے ساتھ براہ راست اور تعمیری گفتگو قائم کرنا تھا۔اس موقع پر ‘ویکست بھارت روزگار آجیویکا گارنٹی مشن (دیہی) – VB GRAM G 2025، چار نئے لیبر کوڈز 2025، اور قومی گیت ‘وندے ماترم‘ کے 150 سال مکمل ہونے پر اس کی تاریخی، ثقافتی اور قومی اہمیت جیسے موضوعات پر تفصیلی تبادلہ خیال کیا گیا۔ پروگرام سے خطاب کرتے ہوئے پی آئی بی رانچی کے سربراہ راجیش سنہا نے کہا کہ اس طرح کے پروگرام حکومت اور میڈیا کے درمیان اعتماد اور تعاون کو مضبوط کرتے ہیں۔ انہوں نے کہا کہ صحافی عوامی بہبود کی اسکیموں کو معاشرے کے آخری شخص تک پہنچانے میں ایک اہم کڑی ہیں۔پروگرام کے مہمانِ خصوصی ونوبا بھاوے یونیورسٹی کے وائس چانسلر پروفیسر (ڈاکٹر) سی بی شرما تھے، جبکہ مہمانِ اعزازی کے طور پر پی آئی بی اور سینٹرل بیورو آف کمیونیکیشن، مشرقی ہند کے ڈائریکٹر جنرل ٹی وی کے ریڈی (کولکتہ) موجود تھے۔ ماہر مقررین میں این یو ایس آر ایل کے اسسٹنٹ پروفیسر ڈاکٹر مرتیونجے مینک، خبر رساں ایجنسی آئی اے این ایس (IANS) کے جھارکھنڈ بیورو چیف اور رانچی پریس کلب کے صدر شمبھو ناتھ چودھری ، دوردرشن نیوز رانچی کے سربراہ دیواکر کمار اور بی ایس ایف میرو کیمپ کے کمانڈنٹ سریندر سنگھ ملک شامل تھے۔ٹی وی کے ریڈی نے کہا کہ مرکزی حکومت کی پالیسیوں کو نچلی سطح تک پہنچانے میں دیہی صحافیوں کا کردار کلیدی ہے۔ پروفیسر سی بی شرما نے کہا کہ ‘وکست بھارت 2047‘ کے ہدف کے حصول کے لیے دیہی معیشت کو بااختیار بنانا ضروری ہے۔ ڈاکٹر مرتیونجے مینک نے نئے لیبر قوانین کے تحت غیر منظم شعبے کے کارکنوں کو ملنے والے سماجی تحفظ اور طبی سہولیات پر روشنی ڈالی۔ شمبھو ناتھ چودھری نے ‘وندے ماترم‘ کی 150 سالہ تاریخ اور قومی اتحاد میں اس کے جذباتی و تاریخی کردار پر بات کی، جبکہ دیواکر کمار نے دیہی ترقی اور پائیدار معیشت کی اہمیت واضح کی۔ بی ایس ایف کمانڈنٹ سریندر سنگھ ملک نے سماجی شراکت داری کے تجربات شیئر کیے۔ پروگرام کی نظامت راجیش سنہا اور گورو پشکر نے کی، اور اختتام پر سوال و جواب کے سیشن کے بعد صحافیوں کو اعزازات سے نوازا گیا۔
