صدر ہسپتال اور ریمس میں 42 بیڈ ریزرو؛ صحت محکمہ کی عوام سے احتیاط کی اپیل
جدید بھارت نیوز سروس
؎رانچی، 14 جنوری :۔ مغربی بنگال میں نپاہ وائرس سے دو افراد کی موت کے بعد جھارکھنڈ حکومت ہائی الرٹ موڈ میں آ گئی ہے۔ ریاستی وزیر صحت ڈاکٹر عرفان انصاری نے تمام اضلاع کے سول سرجنوں کو الرٹ رہنے کی سخت ہدایت دی ہے، جس کے بعد رانچی کے سرکاری اسپتالوں میں نپاہ وائرس سے بچاؤ کے لیے آئسولیشن وارڈ قائم کر دیے گئے ہیں۔
رانچی میں آئسولیشن وارڈ کی تیاری
رانچی کے صدر ہسپتال میں 20 آئسولیشن بیڈ تیار کیے گئے ہیں، جہاں آکسیجن سپلائی کی مناسب سہولت موجود ہے۔ وہیں راجندر انسٹی ٹیوٹ آف میڈیکل سائنسز (رمس) میں بھی نپاہ وائرس کے پیش نظر آئسولیشن وارڈ تیار کر لیے گئے ہیں، جن میں 22 بیڈ شامل ہیں۔
محکمہ صحت اور سول سرجن کی اپیل
رانچی کے سول سرجن ڈاکٹر پربھات کمار نے عوام سے اپیل کی ہے کہ گھبرانے کے بجائے محتاط رہیں۔ انہوں نے کہا کہ نپاہ وائرس خطرناک ضرور ہے، لیکن مضبوط قوتِ مدافعت اور احتیاط کے ذریعے اس سے بچاؤ ممکن ہے۔ محکمہ صحت کے مطابق تمام اسپتالوں میں آئسولیشن وارڈ، ماہر ڈاکٹروں اور آکسیجن کی سہولت دستیاب ہے۔
احتیاطی تدابیر اور علامات
محکمہ صحت نے لوگوں کو بیرونی کھانے سے پرہیز کرنے اور پھل اچھی طرح دھو کر کھانے کی ہدایت دی ہے۔ خاص طور پر کھجور کے استعمال سے وقتی طور پر گریز کرنے کا مشورہ دیا گیا ہے، کیونکہ یہ وائرس فروٹ بیٹ (چمگادڑ) کے ذریعے پھیلتا ہے۔ نپاہ وائرس کی ابتدائی علامات میں تیز بخار، شدید سر درد، پٹھوں میں درد، سانس لینے میں دشواری، گلے میں خراش اور کھانسی شامل ہیں، جبکہ بعد میں دماغی سوجن، بے ہوشی یا کوما جیسی سنگین صورتحال پیدا ہو سکتی ہے۔
پھیلاؤ اور علاج
ڈاکٹر پربھات کمار کے مطابق وائرس چمگادڑ کے پیشاب یا لعاب سے آلودہ پھلوں، بعض جانوروں اور انسان سے انسان میں کھانسی یا چھینک کے ذریعے پھیل سکتا ہے۔ اس سے بچاؤ کے لیے ماسک، صفائی اور سماجی فاصلہ ضروری ہے۔ نپاہ وائرس کا کوئی مخصوص علاج نہیں، بلکہ علامتی علاج، آکسیجن سپورٹ اور آر ٹی پی سی آر جانچ کے ذریعے مریضوں کی نگرانی کی جاتی ہے۔ عوام کو غذائیت سے بھرپور اور گھریلو کھانا کھانے کا مشورہ دیا گیا ہے۔
