کوڈرما میں’’ ناری شکتی وندن ‘‘کنونشن، ہزاروں خواتین کی بھرپور شرکت

خواتین کی خودمختاری نئے بھارت کی پہچان:مرکزی وزیر انّا پورنا دیوی

جدید بھارت نیوز سروس
کوڈرما، 14؍ اپریل: شیو واٹیکا، جھمری تلیا میں ‘ناری شکتی وندن ایکٹ ‘ کی حمایت میں منعقدہ ایک عظیم الشان ‘ناری شکتی وندن کنونشن ‘ میں مرکزی وزیر برائے خواتین و اطفال اور رکن پارلیمنٹ محترمہ انا پورنا دیوی نے شرکت کی اور موجود خواتین سے خطاب کیا۔ اس موقع پر کوڈرما کی ایم ایل اے محترمہ نیرا یادو بھی موجود تھیں۔ پروگرام میں کوڈرما کی مختلف سماجی تنظیموں اور خواتین کے گروپوں کی بڑے پیمانے پر شرکت دیکھنے کو ملی، جس نے اسے ‘سرو سماج ‘ کا ایک مشترکہ پلیٹ فارم بنا دیا۔ چیمبر آف کامرس، انر وہیل کلب، مارواڑی یوا منچ (پریرنا شاخ)، روٹری کلب، سامنتو کالی مہیلا منڈل، گایتری شکتی پیٹھ، جے سیا رام ست سنگ سمیتی، پتنجلی یوگ سمیتی، ماہوری منڈل، مارواڑی مہیلا منڈل، برہما کماری مہیلا منڈل، مودی سماج مہیلا منڈل اور جین مہیلا منڈل سمیت متعدد اداروں نے سرگرم حصہ لیا۔اپنے خطاب میں محترمہ انا پورنا دیوی نے کہا کہ خواتین کی بھرپور شرکت، ان کا اعتماد اور ملک کی تعمیر میں ان کا بڑھتا ہوا کردار نئے بھارت کی پہچان بن چکا ہے۔ انہوں نے کہا کہ وزیراعظم نریندر مودی کی قیادت میں خواتین کو بااختیار بنانے کے لیے کی گئی تاریخی کوششیں، خاص طور پر ناری شکتی وندن ایکٹ، ملک کو نئی سمت فراہم کر رہے ہیں۔
انہوں نے مزید کہا کہ یہ ایکٹ خواتین کی خودمختاری کی سمت میں ایک سنگِ میل ہے، جس نے ملک بھر کی مادری طاقت کو احترام اور نمائندگی کا نیا موقع دیا ہے۔ پروگرام کے دوران مقررین نے معاشرت، سیاست اور معیشت میں خواتین کی بڑھتی ہوئی شرکت، ان کی قیادت اور مستقبل کے امکانات پر اپنے خیالات کا اظہار کیا۔کنونشن میں موجود ہزاروں خواتین نے اجتماعی طور پر عہد کیا کہ وہ اس مہم کا حصہ بنیں گی اور ایک مضبوط، خود کفیل اور ہمہ گیر بھارت کی تعمیر میں اپنی فعال شرکت کو یقینی بنائیں گی۔ اس موقع پر وزیر موصوفہ نے خواتین سے 9667173333 پر مسڈ کال دے کر اس تاریخی اقدام کی حمایت کرنے کی اپیل کی، جس پر بڑی تعداد میں خواتین نے جوش و خروش کے ساتھ اپنی شرکت درج کرائی۔اس کے ساتھ ہی، ناری شکتی وندن ایکٹ کی حمایت میں چلائی گئی دستخطی مہم میں بھی بھرپور تعاون دیکھا گیا، جہاں موجود خواتین نے اپنے دستخط کر کے حمایت کا اظہار کیا۔پروگرام میں “پنچایت سے پارلیمنٹ تک، فیصلوں میں خواتین کی شراکت، نئے بھارت کی تیاری” کا پیغام نمایاں طور پر سامنے آیا، جو خواتین کی بڑھتی ہوئی شرکت اور قائدانہ صلاحیتوں کی ایک مضبوط علامت ہے۔ یہ پروقار تقریب جوش و خروش، وقار اور بے مثال عوامی شرکت کے ساتھ اختتام پذیر ہوئی، جس میں کوڈرما کی خواتین نے متحد ہو کر ناری شکتی وندن ایکٹ کا خیرمقدم کرتے ہوئے ملک کے روشن مستقبل کی تعمیر کے عزم کو دہرایا۔