توسیعی منصوبے کے تحت آبشار میں گلاس برج، نیچر پارک اور دیگر سہولیات بنیں گی
جدید بھارت نیوز سروس
گریڈیہہ،13؍دسمبر: ضلع میں واقع اُسری آبشار قدرت کی آغوش میں بسا ہوا ایک دلکش علاقہ ہے، جو دہائیوں سے سیاحوں کو اپنی طرف متوجہ کرتا رہا ہے۔ یہاں کی خوبصورتی کے معترف عظیم شاعر رابندر ناتھ ٹیگور، سائنسدان جگدیش چندر بوس اور مہارشی اروِند جیسے عظیم شخصیات بھی رہے ہیں۔ اس آبشار پر سال بھر لوگوں کی آمد و رفت رہتی ہے۔ اب اس آبشار کو مزید خوبصورت بنانے کا کام شروع کیا جا رہا ہے، جس کی بنیاد ریاست کے وزیر سودیویہ کمار نے رکھ دی ہے۔ ہفتہ کے روز وزیر نے یہاں حسنِ کاری کے منصوبے کی بنیاد رکھی۔اس موقع پر وزیر سودیویہ کمار نے موجود مجمع سے خطاب کرتے ہوئے آبشار سے جڑی یادیں شیئر کیں اور بتایا کہ اس تاریخی آبشار کو کس طرح ترقی دی جائے گی۔ وزیر نے کہاکہ “اُسری آبشار واقعی اس علاقے کا ایک مقبول سیاحتی مقام ہے۔ یہاں مجموعی ترقی کا خاکہ تیار کیا گیا ہے اور اگلے سال جون تک تمام کام مکمل ہو جائے گا۔”انہوں نے بتایا کہ مقامی زبان میں اسے “ہدہدوا” کہا جاتا تھا۔ بھادو کے مہینے میں آبشار کی آواز دور دور تک سنائی دیتی تھی، اور اس کی خوبصورتی آج بھی لوگوں کو اپنی طرف کھینچتی ہے۔
خواتین کو دی جائے گی تربیت
وزیر سودیویہ کمار نے کہا کہ یہ علاقہ ایک وقت میں غیر پُرامن ہو گیا تھا، لیکن آبشار سیکیورٹی کمیٹی کے قیام کے بعد اب یہاں امن ہے۔ اب یہاں جو بھی ترقیاتی کام ہوگا، جیسے کاٹیجز اور لان وغیرہ کی دیکھ بھال، وہ جوائنٹ فاریسٹ کمیٹی کرے گی۔ اس کے ساتھ ہی انہوں نے کہا کہ مقامی خواتین کو اس مقصد کے لیے انڈین ہوٹل مینجمنٹ انسٹی ٹیوٹ، رانچی سے تربیت دی جائے گی۔ اگلے مرحلے میں آبشار تک بجلی پہنچانے کی بات بھی کہی گئی، جس کے لیے وزیر نے اپنے ڈپازٹ ہیڈ سے رقم دینے کا اعلان کیا۔
افسران نے کیا کہا؟
اس پروگرام سے خطاب کرتے ہوئے ڈی سی رام نیواس یادو نے کہا کہ یہ ایک تاریخی کام ہے، جسے زمین پر اتارنے کا کام وزیر نے کیا ہے۔ ایک سال میں یہاں کی تصویر بدلی ہوئی نظر آئے گی اور یہاں کی کمیٹی کو روزگار کا ذریعہ ملے گا۔ایس پی ڈاکٹر بِمل کمار نے بھی اسے مقامی لوگوں کے لیے ایک تحفہ قرار دیا۔ بیس نکاتی پروگرام کے نائب صدر اور جے ایم ایم ضلع صدر نے بتایا کہ کس طرح ہیمنت سورین کی قیادت میں ریاست میں ترقیاتی کام ہو رہے ہیں، اور یہ اس کی ایک مثال ہے۔
گلاس برج کے ساتھ کیا کیا کام ہوں گے؟
ڈی ایف او منیش تیواری نے بتایا کہ یہاں 18.10 کروڑ روپے کی لاگت سے کئی تعمیراتی کام ہوں گے۔ ان میں انٹری گیٹ، ٹکٹ کاؤنٹر، سینٹرل پلازہ، شیڈڈ سیٹنگ، خواتین و مردوں کے لیے علیحدہ علیحدہ بیت الخلا، گلاس برج، نیچر پارک، بچوں کے کھیلنے کا علاقہ، واچ ٹاور، کاٹیجز، ریسٹورنٹ، بیچلر پکنک ایریا، فیملی پکنک ایریا، وی آئی پی ویونگ ڈیک سمیت کئی دیگر سہولیات شامل ہیں۔آبشار کی بنیاد رکھنے کے موقع پر ایس ڈی ایم شری کانت وسپُوتے، ایس ڈی پی او جیتواہن اُراؤں، رینجر ایس کے روی، اور انسپکٹر شیام کشور مہتو کے علاوہ سُمیت، شاہنواز انصاری، کولیشور سورین، پردھان مرمو اور کئی مقامی لوگ موجود تھے۔
