مہوا ماجی کی اسکولوں اور والدین سے ایم بی یو مہم میں تعاون کی اپیل
جدید بھارت نیوز سروس
رانچی، 6؍ مارچ: بھارت سرکار کے وزیر مملکت برائے دفاع سنجے سیٹھ نے جمعہ کے روز رانچی کے کانٹا ٹولی میں جدید آدھار سیوا کیندر (Aadhaar Seva Kendra ۔ ASK) کا افتتاح کیا۔ اس موقع پر رکن پارلیمنٹ (راجیہ سبھا) محترمہ مہوا ماجی بھی باوقار طریقے سے موجود تھیں۔ اس جدید آدھار سیوا کیندر کا افتتاح رانچی اور آس پاس کے علاقوں میں آدھار خدمات کی فراہمی کو مستحکم کرنے کی سمت میں ایک اہم قدم ہے۔ اس مرکز کو جدید تکنیکی سہولیات اور بہتر بنیادی ڈھانچے کے ساتھ تیار کیا گیا ہے، تاکہ آدھار رجسٹریشن اور اپ ڈیٹ کی خدمات زیادہ تیز، شفاف اور شہریوں کے لیے آسان طریقے سے دستیاب کرائی جا سکیں۔ پہلے جھارکھنڈ میں یو آئی ڈی اے آئی (UIDAI) کے آدھار سیوا کیندر صرف تین اضلاع، رانچی، دھنباد اور مشرقی سنگھ بھوم میں ہی دستیاب تھے۔ اب ان موجودہ مراکز کے ساتھ ساتھ مرحلہ وار طریقے سے نئے آدھار سیوا کینڈرا بوکارو، ہزاری باغ، گریڈیہہ ، دیوگھر، گوڈا، دمکا، صاحب گنج، سرائے کیلا-کھرساواں، مغربی سنگھ بھوم، گڑھوا اور پلاموں میں بھی قائم کیے جائیں گے۔ اس موقع پر وزیر سنجے سیٹھ نے آدھار ایکو سسٹم کو مضبوط کرنے اور لوگوں کو آدھار خدمات تک آسان رسائی فراہم کرنے کے لیے یو آئی ڈی اے آئی کی کوششوں کی ستائش کی۔ انہوں نے کہا کہ اس طرح کے اقدامات عوامی خدمات کی فراہمی میں شفافیت، کارکردگی اور سہولت کو بڑھانے میں اہم کردار ادا کرتے ہیں۔ انہوں نے والدین سے اپیل کی کہ وہ اپنے بچوں کی عمر 5 سال مکمل ہونے پر اور دوبارہ 15 سال کی عمر پر لازمی بائیومیٹرک اپ ڈیٹ (MBU) ضرور کرائیں، تاکہ بچے اسکالرشپ جیسی سرکاری اسکیموں سے فائدہ اٹھا سکیں اور جہاں ضرورت ہو، وہاں NEET اور CUET جیسے داخلہ امتحانات کی رجسٹریشن میں کسی قسم کی پریشانی نہ ہو۔میڈیا سے گفتگو کے دوران رکن پارلیمنٹ (راجیہ سبھا) محترمہ مہوا ماجی نے بھی والدین کی حوصلہ افزائی کی کہ وہ اپنے بچوں کا لازمی بائیومیٹرک اپ ڈیٹ کرائیں اور اسکولوں سے گزارش کی کہ وہ یو آئی ڈی اے آئی کی مشن موڈ مہم کے تحت ایم بی یو (MBU) کے زیر التواء معاملات کو کم کرنے کے لیے فعال اقدامات کریں۔اس پروگرام میں یو آئی ڈی اے آئی کے علاقائی دفتر، رانچی کے ڈپٹی ڈائریکٹر جنرل اکھلیش کمار گپتا اور ڈائریکٹر نیرج کمار سمیت دیگر افسران بھی موجود رہے۔ اسٹیٹ پلازہ، کانٹا ٹولی میں واقع یہ جدید آدھار سیوا کیندر براہ راست یو آئی ڈی اے آئی کے ذریعے چلایا جا رہا ہے۔ مرکز میں معذور افراد، معمر شہریوں اور حاملہ خواتین کے لیے علیحدہ مخصوص کاؤنٹر کا انتظام کیا گیا ہے، تاکہ انہیں خدمات کا فائدہ آسانی سے مل سکے۔ ساتھ ہی دودھ پلانے والی ماؤں کی سہولت کے لیے ایک فیڈنگ روم کا انتظام بھی کیا گیا ہے۔یہ جدید آدھار سیوا کیندر رانچی اور آس پاس کے علاقوں کے رہائشیوں کے لیے آدھار خدمات کے معیار کو مزید بہتر بنائے گا۔ اس سے آپریشنل کارکردگی میں اضافہ ہوگا، درخواست مسترد ہونے کے امکانات کم ہوں گے اور آدھار اپ ڈیٹ کا عمل تیز ہوگا۔ اس کے علاوہ یہاں برتھ رجسٹریشن نمبر (BRN) کی بنیاد پر بچوں کی رجسٹریشن بھی شروع کی جائے گی۔ اس آدھار سیوا کیندر کے روزمرہ کے کاموں کا انتظام Protean eGov Technologies Ltd کے ذریعے کیا جائے گا۔
