تعلیمی اداروں میں تفریق پیدا کرنے کی کوشش ہے، مظاہرین نے بل واپسی کا مطالبہ کیا
جدید بھارت نیوز سروس
رانچی، 14 اپریل: یونیورسٹی گرانٹس کمیشن (UGC) کے نئے ریگولیشن کے خلاف آج یہاں زبردست احتجاجی مظاہرہ کیا گیا۔ لوک بھون کے قریب دھرنا گاہ پر جمع ہو کر مظاہرین نے اپنی مانگوں کے حق میں آواز بلند کی اور گورنر کو میمورنڈم سونپتے ہوئے اس متنازعہ بل کو فوری طور پر واپس لینے کا مطالبہ کیا۔ مظاہرین کا الزام تھا کہ یہ نیا قانون جنرل کیٹیگری (سورن سماج) کے طلبہ کے ساتھ امتیازی سلوک پر مبنی ہے اور انہیں یکطرفہ طور پر مجرم قرار دینے کی گنجائش پیدا کرتا ہے۔ مظاہرے میں شامل سماجی کارکنوں نے سوال اٹھایا کہ جب ایسی کوئی مانگ نہیں کی گئی تھی تو یہ قانون اچانک کیوں لایا گیا؟ سماجی کارکن پریتی سنہا اور این کے تیواری نے کہا کہ اس ریگولیشن کے تحت کسی الزام کی صورت میں ملزم کو اپنی بے گناہی ثابت کرنے کا کافی موقع نہیں ملتا، جبکہ غلط الزام لگانے والے کے خلاف کارروائی کا طریقہ کار بھی واضح نہیں ہے۔ انہوں نے خدشہ ظاہر کیا کہ اس قدم سے یونیورسٹیوں اور کالجوں کا پرامن ماحول متاثر ہوگا اور طلبہ کے درمیان ذات پات کی بنیاد پر تقسیم پیدا ہوگی۔ مظاہرین نے واضح کیا کہ وہ کسی خاص طبقے کے خلاف نہیں ہیں بلکہ اس قانون کو ناانصافی تصور کرتے ہیں، اس لیے تعلیمی اداروں میں ہم آہنگی برقرار رکھنے کے لیے اس کا خاتمہ ضروری ہے۔
