سابق پنچایت ممبر کے قتل کا رشتہ ’شیام سندر ساؤ‘قتل کیس سے نکلا
جدید بھارت نیوز سروس
پلاموں ،17؍فروری: میدنی نگر ٹاؤن تھانہ علاقہ کے کاندو محلہ میں 15 جنوری کو ہونے والے دوہرے قتل کے معاملے میں پولیس کو تحقیقات کے دوران کئی حیران کن معلومات ملی ہیں۔ 15 جنوری کو سابق پنچایت سمیتی ممبر نوین پرساد اور ایک دکاندار کو گولی مار کر ہلاک کر دیا گیا تھا۔ دراصل، یہ فائرنگ کا واقعہ مارچ 2024 میں میدنی نگر میں ہوئے شیام سندر ساؤ قتل کیس سے جڑا ہوا ہے۔نوین پرساد اور دکاندار قتل کیس کے ملزم گولو پاسوان نے پلاموں کورٹ میں سرینڈر کر دیا تھا۔ سرینڈر کے بعد میدنی نگر ٹاؤن تھانہ کی پولیس نے گولو پاسوان کو ریمانڈ پر لیا تھا۔ گولو پاسوان نے فائرنگ کے واقعے کے حوالے سے پولیس کو کئی چونکا دینے والی معلومات دی ہیں۔ گولو نے پولیس کو بتایا کہ وہ کئی دنوں سے نوین پرساد کو نشانہ بنائے ہوئے تھا۔ اس سلسلے میں پلاموں ایس پی ریشما رمیشن نے بتایا کہ پوچھ گچھ کے دوران ملزم گولو پاسوان نے کئی اہم معلومات فراہم کی ہیں۔ گولو پاسوان شیام ساؤ قتل کیس کا بھی ملزم ہے۔
گولو نے نوین کو گولی کیوں ماری؟
پولیس کی تحقیقات میں یہ بات سامنے آئی ہے کہ گولو نے شیام سندر ساؤ قتل کیس میں نوین پرساد کا نام لیا تھا۔ جس کے بعد نوین پرساد کی جانب سے گولو پاسوان پر مسلسل دباؤ ڈالاجا رہا تھا۔ اسی دباؤ میں گولو پاسوان نے فائرنگ کے واقعے کو انجام دیا تھا۔ گولو پاسوان نوین پرساد کا قریبی رہا ہے اور دونوں ایک ہی محلے کے رہنے والے ہیں۔
