یو پی کے دو شوٹر سمیت راہل دوبے گینگ کے 6 ملزمان گرفتار
جدید بھارت نیوز سروس
رام گڑھ،14؍جنوری: پولیس نے کجو فائرنگ کیس کا پردہ فاش کر دیا ہے۔ پولیس نے راہل دوبے گینگ کے چھ جرائم پیشہ افراد کو گرفتار کیا ہے۔ یہ گینگ اتر پردیش کے جونپور کے شکلا گروہ کے شوٹروں کے ساتھ مل کر جھارکھنڈ میں دہشت پھیلانے کا کام کرتا تھا، جن کی مجرمانہ تاریخ کئی ریاستوں میں درج ہے۔ پولیس نے موقع سے دو پستول، ایک کٹا، 42 زندہ کارتوس، آٹھ موبائل اور واقعے میں استعمال ہونے والی بائیک ضبط کی ہے۔
6 جنوری کو ہوئی تھی فائرنگ
6 جنوری کو کجو او پی (OP) علاقے میں ریت کے تاجر ڈبو سنگھ عرف ساگر سنگھ کے گھر پر فائرنگ ہوئی تھی۔ یہ فائرنگ بھتہ (رنگداری) نہ دینے کی وجہ سے کرائی گئی تھی۔ اس پورے معاملے کے پیچھے بدنام زمانہ راہول دوبے گروہ کا نام سامنے آیا تھا، جو طویل عرصے سے علاقے میں دہشت پھیلانے کی کوشش کر رہا ہے۔ واقعے کے بعد رام گڑھ ایس پی اجے کمار کی ہدایت پر ایس آئی ٹی (SIT) تشکیل دی گئی تھی۔ ایس آئی ٹی نے تکنیکی شواہد، سی سی ٹی وی فوٹیج اور خفیہ اطلاع کی بنیاد پر چھاپہ ماری کی۔
پوچھ گچھ کے دوران ملزمان نے اعتراف کیا ہے کہ تاجر سے مسلسل بھتہ مانگا جا رہا تھا۔ رقم نہ ملنے پر خوف پیدا کرنے کے مقصد سے فائرنگ کرائی گئی۔ رام گڑھ کے پولیس سپرنٹنڈنٹ اجے کمار نے بتایا کہ دہشت پھیلانے کے مقصد سے فائرنگ کرنے والے چھ جرائم پیشہ افراد کو گرفتار کیا گیا ہے۔ ان کی گرفتاری این ایچ-33 بھوجپور ڈھابہ اور امام بارگاہ شیام سروور ڈھابہ کے آس پاس کے جنگلات اور جھاڑیوں سے کی گئی ہے۔
یوپی کے دو شوٹر شامل تھے
ایس پی نے بتایا کہ اس فائرنگ کے واقعے میں ستیم شکلا عرف آشیش شکلا کے ساتھ یوپی کے دو بڑے شوٹر جیش پال اور سنی سنگھ عرف آشوتوش سنگھ شامل تھے۔ ایس پی نے بتایا کہ دونوں شوٹروں کے خلاف یوپی کے مختلف اضلاع میں مقدمات درج ہیں۔ اس سے قبل انہوں نے رانچی کے ایک بڑے تاجر کے قتل کی سپاری بھی لی تھی۔ ایس پی نے واضح کیا کہ بھتہ خوری اور منظم جرائم کرنے والوں کے لیے رام گڑھ کی دھرتی محفوظ نہیں ہے۔
گروہ کے مفرور سرغنہ کی تلاش جاری
گرفتار تمام ملزمان کو جیل بھیج دیا گیا ہے، جبکہ گروہ کے مفرور سرغنہ کی تلاش جاری ہے۔ رام گڑھ پولیس کی اس کارروائی سے عام لوگوں میں تحفظ کا احساس مضبوط ہوا ہے۔ چھاپہ مار ٹیم میں ایس ڈی پی او پرمیشور پرساد مانڈو، سرکل انسپکٹر رجت کمار، کجو تھانہ انچارج آشوتوش کمار، ویسٹ بوکارو انچارج دیپک کمار، سب انسپکٹر اونکار پال سمیت کئی پولیس اہلکار شامل تھے۔گرفتار ملزمان میں کجو تھانہ علاقے کے نکول کمار چوہان، راج کمار کرمالی، مکیش کرمالی اور رانچی کے کھیل گاؤں تھانہ علاقے کے رنجیت ساؤ شامل ہیں۔ ان ملزمان میں سے راج کمار کرمالی اور رنجیت ساؤ کے خلاف مانڈو، رانچی سمیت کئی تھانوں میں مقدمات درج ہیں۔ وہیں یوپی کے ضلع جونپور کے جیش پال اور سنی سنگھ بھی گرفتار شدگان میں شامل ہیں۔
