نیٹ امتحان میں دھاندلی پر جے ایم ایم کامرکزی وزیر تعلیم سے استعفے کا مطالبہ

راجیہ سبھا انتخاب میں کراس ووٹنگ کرنے والوں کو قرار دیا ’غدار‘

جدید بھارت نیوز سروس
رانچی، 22 جون :۔ جھارکھنڈ مکتی مورچہ (جے ایم ایم) کے مرکزی جنرل سیکریٹری اور ترجمان سپریو بھٹاچاریہ نے پیر کے روز پارٹی دفتر میں پریس کانفرنس کے دوران نیٹ (NEET) امتحان میں ہونے والی بے ضابطگیوں اور راجیہ سبھا انتخابات کے نتائج پر پارٹی کا موقف واضح کیا۔ سپریو بھٹاچاریہ نے کہا کہ اگرچہ ہندوستانی فضائیہ نے پرچہ جات کو محفوظ طریقے سے پہنچانے کی ذمہ داری بخوبی نبھائی، لیکن امتحان کرانے والی ایجنسی اور مرکزی حکومت اپنی ذمہ داری سے بچ نہیں سکتی۔ انہوں نے خدشہ ظاہر کیا کہ تعلیمی نظام آہستہ آہستہ کارپوریٹ کے ہاتھوں میں جا رہا ہے، جس سے عام طلباء کے لیے میڈیکل کی تعلیم حاصل کرنا مشکل ہو گیا ہے۔انہوں نے طنز کرتے ہوئے کہا کہ اگر امتحانات کو محفوظ بنانے کے لیے فوج کی مدد لینی پڑ رہی ہے، تو پھر دیگر امتحانات کے لیے بھی ایجنسیوں کو متعین کیا جانا چاہیے۔ انہوں نے نیٹ کے طلباء کی خودکشی کے واقعات پر گہری تشویش کا اظہار کرتے ہوئے مرکزی وزیر تعلیم سے استعفے کا مطالبہ کیا۔
راجیہ سبھا انتخابات کے نتائج پر بات کرتے ہوئے انہوں نے کہا کہ جن 50 ارکان اسمبلی نے جے ایم ایم اور کانگریس کے امیدواروں کو ووٹ دیا، ان کے رہنما راہل گاندھی اور ہیمنت سورین ہیں۔ جبکہ جن 28 ارکان نے پرمل ناتھوانی کو ووٹ دیا، ان کے رہنما نریندر مودی اور امت شاہ ہیں۔ واضح رہے کہ انڈیا اتحاد کے پاس 56 ارکان ہونے کے باوجود کانگریس کے امیدوار پرنو جھا کو شکست کا سامنا کرنا پڑا، کیونکہ 6 ارکان اسمبلی نے کراس ووٹنگ کی تھی۔سپریو بھٹاچاریہ نے کراس ووٹنگ کرنے والے ارکان کو براہ راست نشانہ بناتے ہوئے انہیں “غدار” قرار دیا۔ اگرچہ انہوں نے ان ارکان کے خلاف فوری کارروائی کے سوال کو فی الحال ٹال دیا، تاہم یہ اشارہ دیا کہ انتخابی نتائج کا جائزہ لینے کے لیے جلد ہی پارٹی کی میٹنگ ہوگی۔ پریس کانفرنس کے آخر میں انہوں نے بتایا کہ کلپنا سورین اور شیبو سورین کی اہلیہ صدر جمہوریہ کے پروگرام میں شرکت کے لیے گئی ہیں، جہاں سابق مرکزی وزیر و دیشوم گرو شیبو سورین کو پدم بھوشن ایوارڈ سے نوازا جائے گا۔