11ویں اور 13ویں جے پی ایس سی مینس امتحان کے نتائج جاری کرنے کا مطالبہ
جدید بھارت نیوز سروس
رانچی 11 اپریل:ریاست بھر سے امیدوار آج (11 اپریل) جھارکھنڈ پبلک سروس کمیشن (JPSC) کے دفتر کے باہر جمع ہوئے۔ امیدوار 11ویں اور 13ویں جے پی ایس سی مینس امتحان کے نتائج کو جاری کرنے کا مطالبہ کر رہے ہیں۔ دفتر کے باہر احتجاج کرنے والے امیدوار کمیشن کے خلاف مسلسل نعرے بازی کر رہے ہیں۔احتجاج کرنے والے امیدواروں کا کہنا ہے کہ 11ویں اور 13ویں جے پی ایس سی کے امتحانات 2024 میں 342 آسامیوں پر بھرتی کے لیے منعقد کیے گئے تھے۔ جے پی ایس سی چیئرمین کی تقرری کے بعد بھی نتیجہ جاری کرنے میں تاخیر ہورہی ہے۔ نہ صرف نتیجہ بلکہ 14ویں جے پی ایس سی کا نوٹیفکیشن بھی جاری نہیں کیا جا رہا ہے۔ فوڈ سیفٹی آفیسر (ایف ایس او)، چائلڈ ڈیولپمنٹ پروجیکٹ آفیسر (سی ڈی پی او)، اسسٹنٹ پروفیسر اور سول جج جیسی کئی آسامیوں کے نتائج ابھی تک جاری نہیں ہوئے ہیں۔ناراض امیدواروں کا کہنا تھا کہ اس طرح نتائج روکے جانے سے ہزاروں نوجوانوں کا مستقبل تاریک ہوتا جا رہا ہے۔ گزشتہ 9 ماہ سے کمیشن کی جانب سے صرف یقین دہانیاں کی جارہی ہیں۔ امیدواروں کا کہنا تھا کہ انہوں نے کمیشن کے افسران سے ملنے کی کوشش کی لیکن انہیں یہ بہانہ بنا کر ملنے نہیں دیا گیا کہ چیئرمین اپنے دفتر میں نہیں ہیں۔کمیشن کے رویہ سے امیدواروں میں شدید غصہ پایا جاتا ہے۔ وہ کمیشن کے کام کرنے کے انداز پر سوال اٹھا رہے ہیں۔ امیدواروں نے کمیشن کو خبردار کیا ہے کہ اگر جلد نتائج کا اعلان نہ کیا گیا تو وہ کمیشن کے خلاف شدید احتجاج کریں گے۔
