انکم ٹیکس وصولی میں جھارکھنڈ، بہار سے آگے

دھونی سب سے بڑے انفرادی ٹیکس دہندہ قرار

جدید بھارت نیوز سروس
رانچی، 07 مئی:۔ جھارکھنڈ اور بہار کے پرنسپل چیف انکم ٹیکس کمشنر ڈی سدھاکر راؤ نے رانچی میں پریس کانفرنس کے دوران بتایا کہ ٹیکس وصولی کے معاملے میں جھارکھنڈ، بہار سے آگے ہے۔ گزشتہ سال کے 20 ہزار کروڑ روپے کے سالانہ ہدف میں سے 12 ہزار کروڑ روپے جھارکھنڈ سے جبکہ 8 ہزار کروڑ روپے بہار سے حاصل ہوئے ہیں۔ انہوں نے انکشاف کیا کہ سابق کپتان مہندر سنگھ دھونی دونوں ریاستوں میں سب سے بڑے انفرادی ٹیکس دہندہ ہیں، تاہم رازداری کے قواعد کے تحت ان کے ذریعے ادا کردہ رقم ظاہر نہیں کی جا سکتی۔ چیف کمشنر نے بتایا کہ گزشتہ مالی سال کے دوران ٹیکس چوری کے شبہ میں 12 تجارتی گروپوں کے 150 سے زائد مقامات پر چھاپے مارے گئے اور ٹیکس چوری و عدم ادائیگی پر 90 سے زائد مقدمات درج کیے گئے۔ اعداد و شمار کے مطابق دونوں ریاستوں میں تقریباً 5 کروڑ پین (PAN) کارڈ ہولڈرز ہیں، لیکن صرف 40 لاکھ افراد انکم ٹیکس ریٹرن فائل کرتے ہیں۔ انہوں نے مزید کہا کہ اپریل 2026 سے نافذ العمل ہونے والے ‘نئے انکم ٹیکس ایکٹ 2025’ کے حوالے سے چارٹرڈ اکاؤنٹنٹس اور تجارتی تنظیموں کے ساتھ تبادلہ خیال کیا گیا ہے تاکہ ٹیکس دہندگان کو نئے قواعد و ضوابط اور ترامیم سے آگاہ کیا جا سکے۔