JACانٹر میڈیٹ کے نتائج جاری؛ طالبات نے پھر ماری بازی

سائنس میں راشدہ ناز ، کامرس میں شویتا پرساد اور آرٹس میں چھوٹی کماری اسٹیٹ ٹاپر

جدید بھارت نیوز سروس
رانچی، 06 مئی: جھارکھنڈ اکیڈمک کونسل (JAC) کی جانب سے جاری کردہ انٹر میڈیٹ امتحانات 2026 کے تفصیلی نتائج نے ریاست کے تعلیمی منظر نامے میں بیٹیوں کی صلاحیتوں کا لوہا منوا دیا ہے۔اس سال کے نتائج میں ایک بار پھر طالبات نے اپنی برتری ثابت کی ہے۔ بدھ کی شام جاری کردہ حتمی اعداد و شمار کے مطابق، اس سال تمام شعبوں (سائنس، آرٹس اور کامرس) میں طالبات نے نہ صرف کامیابی کے تناسب میں لڑکوں کو پیچھے چھوڑا ہے بلکہ اسٹیٹ ٹاپرس کی فہرست میں بھی اپنی جگہ مضبوط کی ہے۔
ریاستی ٹاپرس کی تفصیلات
جھارکھنڈ اکیڈمک کونسل کے نتائج میں اس سال ریاست کے مختلف اضلاع سے تعلق رکھنے والے طلبہ نے نمایاں پوزیشن حاصل کی ہے۔ سائنس اسٹریم میں دھنباد کے ڈی اے وی پلس ٹو ہائی اسکول کی طالبہ ‘راشدہ ناز ‘ نے 489 نمبرات (97.8%) کے ساتھ پوری ریاست میں ٹاپ کر کے اپنی ضلع کا نام روشن کیا۔ آرٹس اسٹریم میں بوکارو کے کے این پلس ٹو ہائی اسکول کی طالبہ ‘چھوٹی کماری ‘ 478 نمبرات (95.6%) حاصل کر کے پہلے مقام پر رہیں، جبکہ ان کے مدمقابل اسی اسٹریم میں چرکٹ کمار نے بھی 478 نمبروں کے ساتھ برتری حاصل کی۔ کامرس اسٹریم میں رانچی کے یوگوڈا ست سنگا کالج کی طالبہ ‘شویتا پرساد ‘ نے 478 نمبرات (95.6%) کے ساتھ پہلی پوزیشن حاصل کی۔ ان نتائج کی خاص بات یہ ہے کہ سائنس میں ٹاپر کا اسکور سب سے زیادہ رہا، جبکہ آرٹس اور کامرس میں برابری کا مقابلہ دیکھنے کو ملا۔
شعبہ وار کارکردگی اور فرسٹ ڈویژن کا غلبہ
نتائج کے تجزیے سے معلوم ہوتا ہے کہ اس سال اعلیٰ درجے (فرسٹ ڈویژن) سے پاس ہونے والے طلبہ کی تعداد کافی زیادہ ہے۔

• آرٹس: اس شعبے میں سب سے زیادہ 1,07,694 طلبہ نے فرسٹ ڈویژن حاصل کی، جبکہ مجموعی طور پر 96.14 فیصد طلبہ کامیاب رہے۔
• سائنس: اگرچہ یہاں کامیابی کا تناسب 82.92 فیصد رہا، لیکن 61,589 طلبہ نے فرسٹ ڈویژن حاصل کر کے اپنی محنت کا ثبوت دیا۔
• کامرس: اس شعبے میں 93.37 فیصد نتائج کے ساتھ 12,030 طلبہ فرسٹ ڈویژن لانے میں کامیاب رہے۔
  اسٹیٹ ٹاپرس: راشدہ، چھوٹی اور شویتا کا شاندار مظاہرہ
  سائنس کے شعبے میں دھنباد کی راشدہ ناز نے 489 نمبرات حاصل کر کے پوری ریاست میں سب سے زیادہ اسکور کرنے کا اعزاز حاصل کیا۔ آرٹس میں بوکارو کی چھوٹی کماری 478 نمبروں کے ساتھ پہلے مقام پر رہیں، جبکہ کامرس میں رانچی کی شویتا پرساد نے 478 نمبر حاصل کر کے ٹاپ کیا۔ سائنس کے ٹاپ 4 امیدواروں میں سے 3 طالبات ہیں، جو خواتین کی تعلیمی ترقی کی عکاسی کرتا ہے۔
  لاتیہار اور گملا کی کامیابی، پاکوڑ پیچھے
  اضلاع کی کارکردگی میں گملا ایک ایسے ضلع کے طور پر ابھرا ہے جس نے تینوں شعبوں میں ٹاپ تھری اضلاع میں جگہ بنائی ہے۔ آرٹس میں گملا (99.52%) اور کامرس میں سمڈیگا (99.57%) سب سے آگے رہے۔ سائنس میں لاتیہار (93.25%) نے پہلی پوزیشن برقرار رکھی۔ اس کے برعکس پاکوڑ ضلع کی کارکردگی سب سے کمزور رہی، جہاں سائنس میں صرف 66.44 فیصد طلبہ ہی پاس ہو سکے۔
  آن لائن رزلٹ اور مارک شیٹ کی دستیابی
  جیک انتظامیہ نے واضح کیا ہے کہ طلبہ اپنا رزلٹ آفیشل پورٹل کے علاوہ ڈیجی لاکر (results.digilocker.gov.in) اور ایس ایم ایس (SMS) کے ذریعے بھی دیکھ سکتے ہیں۔ کونسل نے بتایا کہ فی الوقت آن لائن جاری کردہ مارک شیٹ عارضی ہے، اور اصل اسناد جلد ہی اسکولوں کے ذریعے تقسیم کی جائیں گی۔ کونسل کے چیئرمین نے تمام کامیاب طلبہ کو مبارکباد دیتے ہوئے ان کے روشن مستقبل کی تمنا کی ہے۔