جب خواتین تعلیم یافتہ اور خود مختار ہوں گی، تبھی معاشرہ ترقی کرے گا: جسٹس
جدید بھارت نیوز سروس
رانچی، 08؍ مارچ: چیریٹیبل چارمز کی صدر ڈاکٹر کھیاتی منجال کی قیادت میں خواتین کو بااختیار اور خود کفیل بنانے کے مقصد سے اسکل ڈیویلپمنٹ ورکشاپ کا افتتاح 8 مارچ کو اندر پرستھ فرایالال اتسو بھون، کوکر، رانچی میں کیا گیا۔ پروگرام کے مہمان خصوصی ڈاکٹر جسٹس ایس این پاٹھک (سابق جج، جھارکھنڈ ہائی کورٹ، رانچی) تھے۔ انہوں نے ورکشاپ کا افتتاح کرتے ہوئے کہا کہ جب خواتین تعلیم یافتہ اور خود کفیل بنتی ہیں تو پورا معاشرہ ترقی کرتا ہے۔ انہوں نے تنظیم کی اس کوشش کی ستائش کرتے ہوئے کہا کہ اس طرح کے سماجی کام معاشرے میں مثبت تبدیلی لانے میں اہم کردار ادا کرتے ہیں۔اسکل ڈیویلپمنٹ سینٹرکے لیے ‘پریم کمار پنیت کمار پریم سنز فاؤنڈیشن ‘ کے پنیت کمار کی جانب سے سلائی مشینیں عطیہ کی گئیں۔اس موقع پر چیریٹیبل چارمز کی فعال رکن اور پی آر کمیٹی کی سربراہ روپم جھا نے کہا کہ تنظیم کی کوشش ہے کہ زیادہ سے زیادہ ضرورت مند خواتین تک ہنر کی تربیت پہنچے، تاکہ وہ خود مختار بن کر اپنے خاندان اور معاشرے کی ترقی میں اپنا حصہ ڈال سکیں۔پروگرام میں تنظیم کی اراکین رجنی پاٹھک، وجے لکشمی، پرتیبھا سنگھ، نمیتا سنگھ، نینسی سنگھ، پریتی جھا، ندھی رائے، کرن سنگھ، امرتا پانڈے، سیٹو پانڈے اور مومیتا چودھری موجود رہیں اور تقریب کو کامیاب بنانے میں اہم کردار ادا کیا۔پروگرام میں بڑی تعداد میں مستحق اور ضرورت مند خواتین نے بھی شرکت کی، جنہوں نے اس پہل کے تئیں جوش و خروش کا اظہار کیا اور تربیت حاصل کر کے خود کفیل بننے کی خواہش ظاہر کی۔چیریٹیبل چارمز تنظیم طویل عرصے سے مستحق خواتین اور بچوں کی فلاح و بہبود کے لیے تعلیم، ہنر کی ترقی اور سماجی بیداری کے شعبوں میں کام کر رہی ہے۔ اس اسکل ڈیویلپمنٹ ورکشاپ کے ذریعے خواتین کو مختلف قسم کے مفید ہنر سکھانے کی پہل کی گئی ہے تاکہ وہ خود مختار بن سکیں اور اپنے خاندان کی معاشی حالت کو مستحکم کر سکیں۔ڈاکٹر کھیاتی منجال نے کہا کہ تنظیم کا مقصد خواتین کو فنی تربیت دے کر انہیں پراعتماد اور خود انحصار بنانا ہے تاکہ وہ معاشرے میں عزت کے ساتھ زندگی گزار سکیں۔پروگرام کے اختتام پر تنظیم کی جانب سے تمام مہمانوں اور حاضرین کا شکریہ ادا کیا گیا۔
