وزیراعلیٰ کی صدارت میں کان کنی اور تعمیرات عامہ کے محکموں کا اعلیٰ سطحی جائزہ اجلاس

غیر قانونی کان کنی پر سختی سے روک تھام اور 300 ریت گھاٹوں کو جلد شروع کرنے کی ہدایت

جدید بھارت نیوز سروس
رانچی، 3 جون:۔ وزیراعلیٰ ہیمنت سورین نے بدھ کے روز جھارکھنڈ منترالیہ میں محکمہ کان کنی و ارضیات اور محکمہ تعمیرات عامہ کی ترقیاتی اسکیموں کا ایک اہم جائزہ اجلاس منعقد کیا۔ اس اعلیٰ سطحی اجلاس میں ریاست کی آمدنی میں اضافے، غیر قانونی کان کنی پر سخت روک تھام اور بنیادی ڈھانچے کے منصوبوں کو مقررہ وقت پر مکمل کرنے پر خصوصی زور دیا گیا۔ وزیراعلیٰ نے متعلقہ حکام کو واضح ہدایت دی کہ نیلام شدہ 300 ریت گھاٹوں کو جلد سے جلد فعال کیا جائے تاکہ ریاست کو تقریباً 3 ہزار کروڑ روپے کا ممکنہ ریونیو حاصل ہو سکے۔
غیر قانونی سرگرمیوں کے خلاف سخت کارروائی
جائزہ اجلاس کے دوران وزیراعلیٰ نے غیر قانونی کان کنی، غیر قانونی ٹرانسپورٹیشن، اوور لوڈنگ اور ریت مافیا کے خلاف سخت ترین کارروائی کرنے کا حکم دیا۔ انہوں نے کہا کہ معدنی وسائل ریاست کا انمول سرمایہ ہیں اور ان کے شفاف و مؤثر استعمال سے نہ صرف سرکاری خزانے میں اضافہ ہوگا بلکہ مقامی لوگوں کو بھی اس کا زیادہ سے زیادہ فائدہ پہنچایا جا سکے گا۔ ہیمنت سورین نے ان کول بلاکس کو ضروری منظوری دلا کر جلد شروع کرنے کی ہدایت دی جو نیلام تو ہو چکے ہیں لیکن ابھی تک وہاں کام شروع نہیں ہو سکا ہے۔ اس کے ساتھ ہی طویل عرصے سے بند پڑی کانوں کو دوبارہ چالو کرنے اور جن کی لیز منسوخ ہو چکی ہے، ان کی دوبارہ نیلامی کا عمل شروع کرنے کا حکم دیا گیا۔ انہوں نے بی سی سی ایل، سی سی ایل اور ای سی ایل کی غیر فعال کانوں کا جائزہ لیتے ہوئے پیداوار بڑھانے کے طریقے تلاش کرنے پر بھی زور دیا۔
سونے کی کان کنی اور معیشت کی مضبوطی
وزیراعلیٰ نے ریاست میں گولڈ مائننگ سیکٹر کو مستحکم بنانے پر خصوصی توجہ دینے کی ضرورت پر زور دیا۔ انہوں نے فی الوقت جاری سات سونے کی کانوں میں پیداوار بڑھانے اور نئی ممکنہ سونے کی کانوں کی نیلامی کے عمل کو تیز کرنے کی ہدایت دی۔ وزیراعلیٰ کا کہنا تھا کہ جھارکھنڈ میں سونے کے وسیع ذخائر موجود ہیں اور سائنسی طریقے سے اس شعبے کی ترقی ریاست کی معیشت کو ایک نئی رفتار فراہم کر سکتی ہے۔
سرکاری کارپوریشنز کی مضبوطی اور روزگار
ریاستی معدنیاتی اداروں کو فعال بنانے کے حوالے سے انہوں نے جھارکھنڈ اسٹیٹ منرل ڈیولپمنٹ کارپوریشن لمیٹڈ (جے ایس ایم ڈی سی) اور جھارکھنڈ مائننگ اینڈ ایکسپلوریشن کمپنی لمیٹڈ (جے ایم ای سی ایل) کو مضبوط بنانے کے لیے زیادہ سے زیادہ معدنی علاقوں کو محفوظ کرنے کی ہدایت دی۔ انہوں نے کہا کہ اس اقدام سے ریاست کی آمدنی بڑھے گی اور مقامی سطح پر روزگار کے نئے مواقع پیدا ہوں گے۔
ماحولیاتی تحفظ اور تعلیمی اداروں کے لیے منصوبہ بندی
وزیراعلیٰ نے ڈی ایم ایف ٹی فنڈ کے مؤثر استعمال، ایمرالڈ (زمرد) کے بلاکس کے تحفظ، پائیدار کان کنی (سسٹین ایبل مائننگ) کو فروغ دینے اور ماحولیاتی معیارات پر سختی سے عمل درآمد کو یقینی بنانے کی بھی ہدایات جاری کیں۔ مزید برآں، ہاسٹلز اور رہائشی اسکولوں میں توانائی کی فراہمی کو بہتر بنانے کے لیے کوئلے کے استعمال کے امکانات پر ایک عملی منصوبہ تیار کرنے کو کہا گیا۔ اس اہم اجلاس میں چیف سکریٹری اویناش کمار، ڈیولپمنٹ کمشنر اجے کمار سنگھ، محکمہ تعمیرات عامہ کے سکریٹری اروا راج کمل، ڈائریکٹر مائننگ راہل کمار سنہا اور ڈائریکٹر جیولوجی کمار امیتابھ سمیت دیگر اعلیٰ حکام موجود تھے۔