جدید بھارت نیوز سروس
رانچی، 25 ستمبر: درگا پوجا کے پیشِ نظر، جھارکھنڈ ہائی کورٹ نے ریاستی حکومت اور ضلع انتظامیہ کو ہدایت دی ہے کہ پوجا پنڈالوں میں تحفظ، صفائی اور امن و امان کو یقینی بنایا جائے۔ چیف جسٹس ترلوک سنگھ چوہان اور جسٹس راجیش شنکر پر مشتمل بینچ نے کہا کہ پوجا کمیٹیوں اور ضلع انتظامیہ کو پہلے سے جاری کردہ تمام رہنما خطوط پر سختی سے عمل کرنا ضروری ہے۔عدالت نے تمام اضلاع کے ڈپٹی کمشنرز اور پولیس سپرنٹنڈنٹس کو ہدایت دی کہ وہ ان احکامات پر مکمل عمل درآمد کریں، اور پوجا پنڈالوں میں حفاظتی اور صفائی کے ضوابط پر سختی سے عمل کرائیں۔ اس کیس کی اگلی سماعت 7 اکتوبر کو مقرر ہے۔عدالت اس معاملے کی از خود سماعت (سواموٹو) کر رہی ہے، جس کا آغاز ڈسٹرکٹ اسکول گراؤنڈ میں درگا پوجا کی اجازت دیے جانے کے بعد ہوا۔ حکومت کی جانب سے داخل کردہ حلف نامے میں کہا گیا ہے کہ پوجا کے اختتام پر گراؤنڈ کو اس کی پہلی حالت میں بحال کر دیا جائے گا۔فائر سیفٹی کے لیے 20 فائر ایکسٹنگوشرز (آگ بجھانے والے آلات) نصب کیے جائیں گے، جبکہ ہجوم پر قابو پانے کے لیے 50 نجی سیکیورٹی اہلکار اور 100 رضاکار تعینات کیے جائیں گے۔ مرد و خواتین کے لیے الگ الگ داخلی و خارجی راستے رکھے جائیں گے، اور ہنگامی حالات کے لیے ایک خصوصی ایمرجنسی ایگزٹ گیٹ بھی بنایا جائے گا۔عدالت نے مزید ہدایت دی کہ اسکول کے اوقات میں اور رات 10 بجے کے بعد لاوڈ اسپیکر کے استعمال پر مکمل پابندی عائد کی جائے۔ ضلع انتظامیہ نے پوجا کمیٹیوں کو واضح طور پر ہدایت دی ہے کہ وہ شور کی آلودگی اور صفائی ستھرائی کے ضوابط پر سختی سے عمل کریں۔عدالت نے رانچی ضلع انتظامیہ کو یہ بھی ہدایت دی کہ وہ 8 ستمبر کو جاری کردہ ہدایات پر پوجا کمیٹیوں کی جانب سے مکمل عملدرآمد کو یقینی بنائے۔
درگا پوجا کے دوران امن و امان اور صفائی کو یقینی بنایا جائے: ہائی کورٹ کی حکومت کو سخت ہدایات
