JBVNL کے SOP پر عمل نہ کرنے پر کارروائی کی جائے گی
جدید بھارت نیوز سروس
رانچی، 25 جون:۔ اب جھارکھنڈ میں تہواروں کے جلوس کے دوران بجلی کی فراہمی میں خلل نہیں پڑے گا۔ ہائی کورٹ کی ہدایت پر جھارکھنڈ الیکٹرسٹی ڈسٹری بیوشن کارپوریشن لمیٹڈ یعنی جے بی وی این ایل نے ایس او پی جاری کیا ہے۔ عام طور پر رام نومی، سرہول اور محرم کے جلوس کے دوران بجلی کاٹنا ضروری ہوتا تھا، کیونکہ بڑے اور اونچے مہاویری جھنڈوں، تاجیہ اور سرنا کے جھنڈوں کے بجلی کے تار سے ٹکرانے سے حادثے کا خدشہ ہوتا تھا۔ اب اس سے بچنے کے لیے ایس او پی جاری کر دیا گیا ہے جس پر تمام منتظمین، کمیٹیوں، عقیدت مندوں اور شہریوں کو عمل کرنا ہو گا۔ خلاف ورزی پر قانونی کارروائی کی جائے گی۔ دراصل، ہائی کورٹ نے تہوار کے دوران جلوس کی وجہ سے 10-10 گھنٹے بجلی کی کٹوتی کا از خود نوٹس لیا تھا۔ اس دوران ہائی کورٹ نے عام لوگوں کو درپیش پریشانی سے نجات کے متبادل حل سے متعلق جواب طلب کیا تھا۔ عدالت نے کہا تھا کہ گرمیوں میں بجلی کی کٹوتی کا اثر بزرگوں، بیماروں، حاملہ خواتین، چھوٹے بچوں اور امتحان دینے والوں پر زیادہ پڑتا ہے۔بجلی نہ ہونے کی وجہ سے کاروباری ادارے بند ہونے سے ریونیو کا نقصان ہوتا ہے۔ ہسپتال بھی متاثر ہیں۔ تب ایڈوکیٹ جنرل راجیو رنجن نے پلاموں میں سال 2000 میں پیش آنے والے واقعے کا حوالہ دیا تھا، جس میں 29 لوگ مارے گئے تھے۔ انہوں نے کہا تھا کہ اسی وجہ سے رام نومی اور محرم کے جلوسوں میں بجلی کاٹنا پڑتی ہے۔اس پر ہائی کورٹ کے چیف جسٹس کی ڈویژن بنچ نے کہا تھا کہ سڑک پر سفر کرتے ہوئے، ٹرین یا ہوائی جہاز سے حادثات ہو سکتے ہیں۔ اس کے لیے لوگوں کو سڑک، ٹرین یا ہوائی جہاز کے استعمال سے نہیں روکا جا سکتا۔ کسی بھی قسم کے حادثے سے بچنے کے لیے اقدامات کیے جائیں۔ جب جلوسوں کی اجازت ہو تو کھمبوں اور جھنڈوں کی اونچائی اور لمبائی بھی طے کی جائے۔ جے بی وی این ایل نے اس معاملے میں ایس او پی جاری کیا ہے۔
