ڈاکٹر کے نسخے کے بغیر کھانسی کے سرپ کی فروخت پر پابندی
جدید بھارت نیوز سروس
رانچی ، 6؍ اکتوبر:کھانسی کے سرپ کے استعمال سے بچوں کے متاثر ہونے کی خبروں کے بعد رانچی ضلع انتظامیہ الرٹ ہو گئی ہے۔ڈپٹی کمشنر اور ضلع مجسٹریٹ، رانچی، منجوناتھ بھجنتری نے سول سرجن، رانچی کو ضروری ہدایات جاری کی ہیں، تاکہ اس بات کو یقینی بنایا جا سکے کہ ضلع میں کسی بھی بچے کی صحت بری طرح متاثر نہ ہو۔ ڈپٹی کمشنر منجوناتھ بھجنتری نے ہدایت دی ہے کہ کوئی بھی میڈیکل اسٹور ڈاکٹر کے نسخے کے بغیر کھانسی کا سرپ فروخت نہیں کرے گا۔سول سرجن کے ذریعے تمام ڈاکٹروں کو یہ بھی ہدایت کی گئی ہے کہ وہ کھانسی کا سرپ صرف ان عمر کے بچوں کو تجویز کریں جہاں اس کے مضر اثرات کا کوئی امکان نہ ہو۔ضلعی انتظامیہ نے یہ بھی واضح کیا ہے کہ ان ہدایات کی خلاف ورزی کرنے والے میڈیکل اسٹورز یا ڈاکٹروں کے خلاف سخت کارروائی کی جائے گی۔اس کے علاوہ مارکیٹ میں دستیاب کھانسی کے مختلف برانڈز کے سیرپ کے نمونے سول سرجن کے ذریعے ٹیسٹ کیے جائیں گے تاکہ ان سیرپس کے معیار اور حفاظت کی تصدیق کی جا سکے۔ ضلعی انتظامیہ نے والدین سے اپیل کی ہے کہ وہ ڈاکٹر کے مشورے کے بغیر بچوں کو کھانسی کا سرپ نہ دیں۔
